Hatutan.com, (08 Maiu 2023), Díli-Fundu Petrolíferu hahú primeiru trimestre, tinan ida-ne’e, ho dezenpeñu ida pozitivu. Fundu hetan rendimentu investimentu la inklui despeza hamutuk $697,1 milloens no total retornu investimentu bá trimestre 3,56% inklui kustu no despeza sira seluk.

Lee Mós : Survey IRI: Timor-Leste Enfrenta Problema Boot iha Ekonomia

Edifísiu Ministériu Finansas, Dili. Foto/Espesiál

Sita  komunikadu imprensa hosi Ministériu Finansa, Segunda (8/5/2023), haktuir  fundu ninia kapital aumenta $418 milloens husi $17,4 biloens iha trimestre anterior ba $17,8 billoens iha trimestre ida ne’e. Reseitas petrolíferas hamutuk $21,2 milloens, enkuantu Governu halo levantamentu $300 milloens hodi finansia Orsamentu Estadu.

Títulus no asoens rejista retornu pozitivu iha primeiru trimestre. Inflasaun global tu’un husi nível a’as iha tinan kotuk maibé nafatin iha nível ida a’as. Banku sentral sira kontinua hasa’e taxa-de-juru hodi redús presaun inflasionária.

Gañu iha trimestre ida ne’e no kuartu trimestre tinan kotuk taka fali perda/lakon iha valor nebe’e akontese iha inísiu tinan 2022. Fundu ninia retornu anual desde inisíu hamutuk 4,2%. Retornu asoens kada tinan maka 9,4% desde ninia introdusaun iha 2010, enkuantu rendimentu fixu ninia retornu anual 2% desde 2005. Asoens oferese retornu esperadu bo’ot iha tempu naruk maibé retornu sira ne’e voláteis teb-tebes iha tempu badak.

Fundu Petróliferu ninia stratéjia investimentu hetan ajustamentu iha Jullu 2021 hodi tau ba iha konsiderasaun faze dekumulasaun Fundu. Introdús Karteira Likidez ho ativus risku ki’ik (kaixa no títulus Tezouru EUA ho maturidade badak) hodi finansia Governu ninia levantamentu iha tinan tolu tuir mai. Restu husi Fundu nia ativu investe iha Karteira Kresimentu, nebe’e ho durasaun tempu naruk no inklui alokasaun 35% ba asoens. Segmentasaun tulun Fundu diak teb-tebes iha 2022. Investimentu iha Karteira Likidez ho risku-kiik asegura estabalidade iha ativu ninia valor no finansia Governu ninia levantamentu hamutuk $1,4 billoens, iha tempu ida nebe’e títulus no asoens nia valor monu dala ida.

Halo rebalanseamentu ba Karteira Likidez husi Karteira Kresimentu kada tinan hodi tau ba iha konsiderasaun Governu ninia levantamentu. Rebalanseamentu halo iha primeiru trimestre tinan ida ne’e. Iha fim Marsu, $3,2 billoens investe iha Karteira Likidez no $13,9 billoens investe iha Karteira Kresimentu. Alein investimentu iha instrumentu merkadu finanseiru, Fundu mós emite dívida privada ba Timor Gap, E.P. iha 2019. Kada tinan avaliador independente halo avaliasaun ba dívida privada ida ne’e.

Lee Mós : Banku Mundiál: Timor-Leste Nia Kreximentu PIB Atrazu iha Nivel Rejionál

Jornalista: Rogério Pereira Cárceres