Hatutan.com, (16 Maiu 2023), Díli- Partidu Unidade Dezenvolvimentu Demokrátiku (PUDD) tau prioridade bá dezenvolvimentu Instituisaun Polísia Nasionál Timor-Leste (PNTL) ho FALINTIL-Forsa Defeza Timor-Leste (F-FDTL), liuliu kria kondisaun no infraestrutura bá  postu Polisia ho F-FDTL iha fronteira atu bele kombate movimentu no tranzaksaun ilegal sira ne’ebé lori prejuízu bá Estadu Timor-Leste.

Lee Mós : PUDD iha Programa Haat Ne’ebé Sira Konsidera Primadona

Kampaña PUDD iha Tasi Tolu, Díli, Sesta (05/05/2023). Foto/Elio dos Santos da Costa

Bainhira hetan fiar husi povu, PUDD sei kria  kondisaun mínima bá F-FDTL iha kompañia aero atu bele iha elikópteru rasik hodi fó apoiu lojístika bá F-FDTL no bele mós bá kontrola fronteira marítima no terrestre.

Sekretáriu Jerál PUDD, Aleixo do Carvalho Monteiro hateten, prioridade ne’ebé PUDD iha bá setór Defeza no Seguransa, liuliu iha área fronteira mak sei buka atu hadi’a infraestrutura liga bá edifísiu públiku hanesan kazerna no fasilidade bá polísia munisipál no patrulhamentu fronteira iha liña fronteira terrestre sira.

“Há’u hakarak hateten katak ko’alia kona-bá dezenvolvimentu seitór Defeza no Seguransa iha fronteira ne’e buat ida integradu, tan ne’e bainhira  PUDD hetan fiar hosi povu, ami sei hadia, kazerna no kompleta fasilidade sira bá seguransa iha fronteira nian,” Sekretáriu Jerál PUDD Aleixo do Carvalho Monteiro iha ámbitu debate entre partidu polítiku sira ne’ebé organiza husi CNE iha salaun OKA, Surik Mas, Tersa (16/05/2023).

PUDD mós iha planu integradu iha área Defeza no Seguransa atu hadia beim star ba mambru ka ajente sira defeza no seguransa nian ne’ebé servisu iha área fronteira atu sira bele halo servisu másimu liu no kontrola ho di’ak área fronteira sira Timor-Leste nian.

Atu ajente seguransa no defeza sira halo servisu di’ak liu tan iha área fronteira PUDD iha mós planu atu reforsa lei sira ne’ebé iha hodi kontrola, maibé mós haforsa lei atu hasae saláriu bá forsa Defeza no Seguransa ne’ebé servisu área fronteira.

“Ami iha planu sei hasae saláriu ba ajente polísia no forsa Defeza ne’ebé halao misaun iha fronteira, la’ós ne’e de’it PUDD mós sei tau prioridade bá kazerna no fasilidade sira atu apoiu sira servisu di’ak liu tan no ho profisionál,” Nia subliña.

PUDD mai ho konseitu ida ukun povu ho nasaun tamba ne’e PUDD sei kaer metin ba prinsípiu sentru moderadu inovasaun, signifika katak hamutuk habot nasionalizmu no patriotizmu komum hodi hala’o dezenvolvimentu bá povu no nasaun.

Jornalista: Vito Salvadór