Hatutan.com, (05 Maiu 2023), Díli- Partidu Unidade Dezenvolvimentu Demokrátiku (PUDD) iha polítika atu liberta povu bá moris di’ak no hakmatek liu husi asaun unidade nasionál  bá dezenvolvimentu nasionál.

Lee Mós : PUDD Prontu Kaer Ukun Atu Dada Kadoras Mai Viqueque

Kampaña PUDD iha Tasi Tolu, Díli, Sesta (05/05/2023). Foto/Elio dos Santos da Costa

Atu povu moris diak no dignu, PUDD iha programa prioridade haat ne’ebé PUDD konsidera hanesan programa primadona. Programa ne’e mak hanesan, dezenvolvimentu sosial, dezenvolvimentu setór defeza, seguransa, negósiu estranjeiru no kooperasaun, dezenvolvimentu polítika interna, justisa no administrasaun teritórial no ida ikus liu mak dezenvolvimentu ekonómia nasionál.

Iha dezenvolvimentu sosiál sei kobre área edukasaun, kultura saúde no inkluzaun Sosiál. Iha área Edukasaun, PUDD iha planu prioridade atu hadia sistema dezenvolvimentu edukasaun ida inkluzivu liu husi estabelese padraun bá kualidade  ensinu bá nivel Edukasaun sira hotu.

Área kultura, PUDD iha planu atu apoiu prezervasaun pratika lisan orijen hotu nu’udár identidade nasionál no rendimentu sustentável bá komunidade.

Saúde nian, PUDD sei dezenvolve sistema servisu saúde bá ema hotu liu husi garante asesu ekuitativu bá servisu saúde bázika esensial ho di’ak, planu asaun partisipativu, distribuisaun pesoál saúde ne’ebé ekivalente no tau mós atensaun ba infraestrutura ne’ebé sensível bá ema ho defisiénsia.

Iha polítika inkluzaun Sssiál PUDD sei tau prioridade bá servisu inkluzaun sosiál, dignifika veteranu sira, apoiu grupu vulnerável.

Iha dezenvolvimentu setór defeza, seguransa, negósiu estranjeiru no kooperasaun, PUDD sei tau prióridade atu dezenvolve defeza nasionál, reforsa sistema seguransa interna, haforsa atividade defeza komunitáriu no enjeñaria.

Iha negósiu estranjeiru no kooperasaun PUDD sei tau prioridade ba reforsa kooperasaun bilaterál no multilateral ne’ebé Timor-Leste iha.

Kampaña PUDD iha Tasi Tolu, Díli, Sesta (05/05/2023). Foto/Elio dos Santos da Costa

Dezenvolvimentu politika interna, justisa no administrasaun teritórial, PUDD sei tau atensaun atu hadia sistema administrasaun públika hodi presta atendimento públiku ho di’ak, hadia lei funsaun públika, promove polítika promosaun grau no saláriu funsionáriu públiku.

Hatuur los sistema judisiáriu tuir Konstituisaun Repúblika Demokrátika Timor-Leste (K-RDTL). Aselera polítika desentralizasaun no dezenvolvimentu tenke mai husi suku hodi fó espasu ba sidadaun ho defisiensia iha direitu asesu hanesan ho sidadaun sira seluk.

Kona-bá dezenvolvimentu ekonómia nasionál (Green Economy) PUDD prioritiza ajustamentu orsamentu jerál estadu kada tinan foku bá setór produtivu, haforsa parseria públiku no seitor privadu.

Prezidente partidu PUDD, Silvestre Sufa hateten, PUDD hanesan partidu polítiku ne’ebé nia militante kuaze joventude hotu kedas tamba ne’e iha PUDD nia programa primadoma haat ne’ebé iha ajusta mós ho prioridade sira bá juventude sira mak iha formasaun tékniku vokasional ba foin-sa’e sira hodi prepara foin-sa’e sira ba merkadu internasionál ho abilidade ne’ebé suficiente bainhira sai ba servisu iha liur.

Nia afirma, sei dezenvolve no apoiu setór kooperativa, liuliu kooperativa no grupu inovador emprendedorizmu ne’ebé apoiu foin-sa’e sira. no seitór Agrikultura no Peskas sei sai seitór prióridade atu sustenta ekonómia nasaun nian ho produtu agríkola sira.

“PUDD kuandu hetan oportunidade husi juventude sira maka PUDD hakarak hasa’e estatutu SEFOPE ba Ministériuho razaun atu juventude sira hetan formasaun ne’ebé dignu, sufisiente no adekuadu atu bele iha abilidade hodi kompete iha kampu traballu,” Silvestre Sufa hateten bá militante no simpatizante sira iha kampaña aberta ne’ebé hala’o iha Tasi Tolu, Díli, Sesta (05/05/2023).

PUDD mós sei iha polítika bá kriasaun indústria atu foin-sa’e sira fasil asesu bá servisu. Dalan atu hamenus no halakon dezempregu mak liu husi kriasaun indústria iha seitór produtivu sira ne’ebé Timor-Leste iha potensialidade.

PUDD mós sei fó oportunidade bá foin-sa’e sira atu hatudu sira nia talentu iha arte, desportu, siensia, no téknolojia liu husi kompetisaun ne’ebé pozitivu hodi kompete iha nasionál no internasionál.

“Tinan-tinan foin-sa’e sira ne’ebé remata estudu iha nivel universitáriu no gradua atinze 5,000 too 6,000 maibé kampu traballu laiha tamba ne’e PUDD sei defende ekonómia sustentabilidade no kriasaun bá indústria atu garante kampu traballu ba foin-sa’e sira,” Nia subliña.

Sekretáriu Jerál PUDD Aleixo do Carvalho Monteiro hateten bainhira povu fó fiar bá PUDD sei defende povu nia moris liu husi programa polítika ne’ebé PUDD iha.

PUDD komprometidu atu lori empregu bá juventude sira iha Timor-Leste liu husi investimentu iha setór agrikultura, turismu, indústria, Infraestrutura no setór hotu-hotu ne’ebé bele garante povu moris di’ak.

“Ita PUDD mos defende Edukasaun, Agrikultura, Saúde, Defeza no Seguransa, Desentralizasaun Podér Lokál no programa prioridade sira ba juventude tamba PUDD opta unidade nasionál iha ne’ebé juventude no povu hotu mak autór bá dezenvolvimentu nasionál,” Aleixo do Carvalho Monteiro tenik.

Sekretáriu Jerál ne’e hatutan tempu too ona atu povu no foin-sa’e sira fó fiar bá PUDD atu fó kontribuisaun ba dezenvolvimentu nasionál iha rai ne’e.

Nia subliña programa primadona sira ne’ebé PUDD iha mak sei sai hanesan mata dalan uniku atu PUDD kaer hodi ajusta ho polítiku Planu Estratéjiku Dezenvolvimentu Nasionál bá povu nia moris di’ak.

Jornalista: Vito Salvadór