Hatutan.com, (16 Maiu 2023), Díli- Partidu Desenvolvimento Nacional (PDN) komprometidu sei tau prioridade bá dezenvolvimentu setór agrikultura atu bele kontribui bá hadi’a problema nutrisaun ne’ebé Timor-Leste enfrenta.

Lee Mós : PDN Hakarak Harii Fundu Espesiál bá Juventude

Prezidente PDN, Lucas Soares Colibere. Foto/Vito Salvadór

PDN iha programa prioritáriu bá iha setór Agrikultura no Peska no PDN kompremetidu atu hasa’e produsaun plantas alimentar, plantas industriais no horticultura liu husi intensifikasaun, intensifikasaun, no diversifikasaun. Hasae produsaun animal, halo konservasaun bá floresta no apoiu peskador sira inklui kria indústria peska.

Objetivu prinsipál husi programa prióridade ne’ebé PDN tau iha seitór agrikultura no peska mak atu bele kontribui bá hadi’a problema subnutrisaun no povu bele moris ho nutrisaun diak no goza sira nia direitu bá moris di’ak no moris saudável ho kbi’it ne’ebé iha.

Advertisement

Prezidente PDN, Lucas Soares Colibere hatete problema nutrisaun sai mos preokupasaun bo’ot partidu PDN nian. Uainhira ema moris ho nutrisaun la di’ak, kontribui bá problema sosiál, edukasaun no dezenvolvimentu umanu tamba ema moris ho nutrisaun la di’ak sei afeta bá ema nia intelijénsia no seluk tan.

“Problema má-nutrisaun sai problema no preokupasaun povu no nasaun tomak nian. Tamba ne’e atu kombate ida-ne’e, PDN hanoin katak bainhira bá ukun sei tau prióridade no orsamentu bo’ot ba iha seitór agrikultura atu bele kombate má-nutrisaun tamba hahán hotu-hotu ne’ebé nutritivu no iha vitamina di’ak mai hhusi seitór agrikultura ne’ebé kompostu husi pekuária, peska, no seluk tan,” Prezidente Partidu PDN Lucas Soares Colibere hateten iha ámbitu debates partidu polítiku ne’ebé organiza hosi CNE, iha Salaun OKA, Surik Mas, tersa (16/05/223).

Prezidente PDN hatutan, atu ezekusaun bá programa má-nutrisaun l00s disk PDN iha mos planu atu kria ministériu ida propriu ho orsamentu rasik hodi tau prióridade ba kombate mal nutrisaun.

PDN mos iha planu atu povu kbi’it lae, mártires sira nia oan, no família sira ne’ebé iha oan barak bele hetan mos subsídiu husi estadu liu husi, simu ai-han nutritivu, Susuben, ai-fuan, manii tolun,  ikan no naan husi governu. No produtu sira ne’ebé sei fo subsídiu ba populasaun sira hodi kombate problema mal nutrisaun sei mai husi investimentu ne’ebé governu halo ba seitór produtivu sira hanesan agrikultura, peska, Pekuária no Indústria agrícola sira.

Lucas Soares Colibere mós argumenta katak Timor-Leste sei hola parte iha organizasaun rejionál ASEAN tamba ne’e Governu tenke iha preparasaun ida diak atu bele iha kompetisaun merkadu ai-han, Timor-Leste bele iha hahan ne’ebé ho kualidade, nutritivu no kontribui bá dezenvolvimentu ekonomia iha Timor-Leste.

Advertisement

Jornalista: Vito Salvadór