Hatutan.com, (16 Maiu 2023), Díli-Diretór ezekutivu Asosiasaun HAK, Feliciano da Costa Araújo, husu bá líderansa partidu polítiku sira hotu, atu hatudu sira-nia maturidade nu’udár ema polítiku ida, kria nafatin ambiente ne’ebé nakonu ho dame no valoriza demokrásia iha Timor-Leste.

Lee Mós : KHUNTO Keixa CNRT bá Ministériu Públiku

Militante partidu KHUNTO nian na’in-haat (4) hala’o tratamentu saúde iha Sentru Saúde Vera-Cruz, tanba hetan tuda hosi ema deskonfia no kanek, hafoin fila hosi kampaña ikus iha Tasi-tolu, Sesta (12/05/2023). Foto/Dok.KHUNTO.

Diretór Feliciano da Costa Araújo husu ne’e durante fó sai Asosiasaun HAK ninia “Rezultadu Monitorizasaun bá Kampaña Eleisaun Parlamentár tinan 2023 nian, hahú hosi loron 6 to’o 13 ne’e, Tersa (16/5/2023).

Asosiasaun HAK husu bá partidu polítku sira atu kontínua kumpre regra sira durante Kampaña Eleisaun Parlamentár, iha loron eleisaun, no to’o iha prosesu kontájen votu sira iha kada sentru votasaun, munisípiu no nasionál, to’o Tribunál Rekursu fó sai rezultadu finál eleisaun parlamentár, tinan ne’e.

Advertisement

“Partidu polítku sira presiza hatudu maturidade polítika, no hatudu ambiente ne’ebé nokonu ho dame, no fó f valór no kualidade demokrásia iha ita-nia nasaun,” diretór ezekutivu Asosiasaun HAK, Feliciano da Costa Araújo hateten iha konferénsia imprénsa, iha kna’ar fatin Faról-Díli.

Asosiasaun HAK husu bá polítiku sira hothotu, iha komísiu, hato’o de’it programa polítiku, oinsá atu bele hadi’a povu nia moris no evita insulta malu iha palku kampaña eleitorál.

Asosiasaun HAK husu mós bá Komandu Polísia Nasionál Timor-Leste (PNTL) atu asegura estabilidade nasionál, ho nune’e, eleisaun parlamentár, tinan ne’e, bele la’o ho susesu.

Asosiasaun HAK, hamutuk ho nia Rede Grupu Alvu Estratéjiku (GAS) hosi Munisípiu Baucau no Díli, ne’ebé hala’o Monitorizasaun bá Kampaña Eleisaun Parlamentár tinan 2023, hosi loron 6 to’o 13 fulan-Maiu ne’e, identifika iha kontra regra bá kampaña Elpár nian ne’ebé komete hosi Partidu Polítiku sira.

Regra hirak ne’ebé Partidu Polítiku sira la kumpri mak hanesan ne’e;

Advertisement

Envolvimentu Labarik sira

1. Iha loron 06 Maiu, Partidu Unidade Dezenvolvimentu Demokrátiku (PUDD), realiza komísiu iha Tasi-tolu ne’ebé envolve labarik sira.
2. Iha loron 07 Maiu, partidu Congresso Nacional de Reconstrucção Timorense (CNRT), realiza kampaña ho tipu diálogu ho komunidade sira iha Munisipiu Baucau, Suku Buruma, iha partisipasaun labarik. Iha tempu hanesan, CNRT realiza diálogu iha Postu Administrativu Venilále, iha mós partisipasaun labarik.
3. Iha loron 07 Maiu, partidu Frente Revolusionáriu bá Timor-Leste Independente (FRETILIN), hala’o diálogu ho komunidade sira iha bairru Karantina, Suku Comoro, Postu Administrativu Dom Aleixo, iha partisipasaun hosi labarik.
4. Iha loron 13 Maiu, Partidu Libertasaun Populár (PLP), hala’o Mini Komísiu iha Kampaun Mulia “Waiaka”, iha mós partisipasaun hosi labarik, inklui uza atributu partidu nian.

Kampaña Besik Edifísiu Públiku

Konforma artigu 12 Dekretu Governu, kampaña no propaganda eleitorál, labele besik edifísiu públiku, maibé, tuir monitorizasaun Asosasaun HAK, no Rede GAS sira haree katak, iha loron 06 Maiu, partidu FRETILIN realiza nia konsolidasaun iha Suku Uailili, Postu Administrativu Buacau Villa, utiliza edifísiu públiku, hanesan Sede Suku Uailili nian.

Mosu Konfrontasaun

Iha loron 13 Maiu, Mini Kampaña hosi PLP, realiza iha fatin Kampaun “Mulia Uaiaka”, mosu konfrontasaun hosi joven sira. Tuir monitorizasaun Rede GAS Munisipiu Baucau, observa katak, membru PNTL ne’ebé fó seguransa bá Mini Komísiu ne’e, la’ós bá neutraliza situasaun, maibé, halo ‘fali’ agresaun fízika hasoru joven sira, no rezulta vítima ida tama Ospitál, iha sala emerjénsia Horez Baucau.

Kontra Regulamentu Tránzitu

Advertisement

Iha loron 06 Maiu, PUDD realiza ninia komísiu iha Tasi-tolu, Militante sira ne’ebé halo konvoi tuir kampaña ne’e, barak mak la uza kapasete. Tuir monitorizasaun ekipa HAK nian iha terrenu nota katak, membru polísia sira ne’ebé destakadu, hodi fó seguransa bá kampaña ne’e, la halo intervensaun bá militante sira ne’ebé vióla hela regulamentu tránzitu nian.

Jornalista: Rogério Pereira Cárceres