Hatutan.com, (21 Maiu 2023), Díli—Polísia Nasionál Timor-Leste (PNTL), liuhosi Komandu Munisipiu Liquiça, iha Domingu (21/05/2023) tuku 10:30 dadeer Otl, detein ona sidadaun estranjeiru ida ho inisiál VA, hosi Repúblika Indonézia (RI), tanba tenta atu tama bá vota iha Sentru Votasaun Eskola Bázika Sentrál (EBC-Sigla Português), Suku Darulete, Postu Administrativu Liquiça-villa.

Sidadaun Sira Forma hodi ba Vota iha Sentru votasaun aldeia Rio de Janeiro, Suku Bairru-Pité, Postu Administrativu Dom Aleixo, Munisípiu Díli. Foto/Elio dos Santos da Costa.

Komandante PNTL Munisipiu Liquiça, Superintendente Polísia, Umbelina dos Santos Soares konfirma katak, insidente ida-ne’e loos duni no sidadaun estranjeiru ne’e tama bá forma ona iha liña laran, atu hakat bá sentru votasaun laran.

Lee Mós: Timor-Leste Vota, Xanana: CNRT Mak Manan no Lú Olo Mós Garante FRETILIN Manan

Maibé, bainhira nia sei iha liña laran, sidadaun no eleitór sira balun ne’ebé besik iha sentru votasaun ne’e, balun hakilar no informa bá pessoál sira STAE nian hanesan brigada no polling staff katak, VA la’ós Timoroan.

“Informasaun ida ne’e loos. Sidadaun mane ida ho inisiál VA  nia hosi Indonézia, koko atu tama bá vota, depois de nia iha ona liña, iha sentru votasaun EBC Darulete, komunidade sira halo reasaun. Entaun, ita-nia fiskais sira, brigada sira entrega mai iha seguransa,” Superintendente Polísia Umbelina dos Santos Soares hateten bá Hatutan.com via telefone ohin.

Komandante Umbelina informa tán, sidadaun Indonézia ne’e atu bá vota, tanba iha mós asesu bá kartaun identidade ka Kartaun Eleitorál. Alende ne’e, PNTL mós seidauk hatene loloos sidadaun ne’e, kaben no Timoroan ka Indonézia.

“Nia iha kartaun eleitorál. Tuir ami hatene. Agora daudaun ita halo hela prosesu identifikasaun, ami halo ona no nia kaben-na’in, iha fen, iha oan. Maibé, ami la hatene nia kaben ho timor oan ka, kaben ho ema indonézia,” komandante Umbelina hateten. 

Hafoin detensaun ne’e, Komandu PNTL Munisipiu Liquiça, halo kedan identifikasaun bá sidadaun ne’e, inklui halo ona mós partispasaun no entrega ona bá ekipa sira iha Departamentu Investigasaun Kriminál (DIK), iha Kuartel Jerál PNTL Caicoli.

Jornalista: Rogério Pereira Cárceres