Hatutan.com, (24 Maiu 2023), Díli-Iha ámbitu kampaña to’o eleisaun parlamentár, 21 fulan-Maiu liubá, Komandu FALINTIL-Forsa Defeza Timor Leste (F-FDTL) koloka nia membru 1000 iha territóriu nasionál  hodi apoiu Polísia Nasionál Timor-Leste (PNTL).

Lee Mós : Maiu, Governu Rekruta Membru Espesiál F-FDTL Na’in-87

FALINTIL-Forsa Defeza Timor Leste (F-FDTL). Foto/Elio dos Santos da Costa

Forsa sira-ne’e destaka iha   munisípiu-13 ho Rejiaun Administrativu  Espesiál Oé-Cusse Ambeno  (RAEOA). Ho nune’e, Xefe Estadu Maior F-FDTL, Tenente Jenerál Domigos Raúl “Falur Rate Laek” dehan, atu retira membru sira-nee hosi munisípiu mai fila  kuartel jenerál no komponente sira ida-idak depende  bá evolusaun situasaun iha rai-laran.

“Bainhira situasaun iha fatin balu seidauk normaliza, forsa sei kontínua mantein,” Tenente Jenerál Domigos Raúl “Falur Rate Laek” hateten bá jornalista sir  hafoin partisipa iha abertura apuramentu nasionál iha CNE, Caicoli, Díli, Kuarta (24/05/2023).

Advertisement

Iha 12 fulan-Maiu liubá, Komandu Jenerál  F-FDTL organiza parada militár ida iha Tasi-tolu hodi koloka nia membru hamutuk 1000 bá munisípiu hotu hodi reforsa PNTL atende kazu emerjénsia ruma mak mosu iha ámbitu Eleisaun Parlamentár 2023.

“Ha’u fó instrusaun ne’e, depois oras 48. Depois anunsiu rezultadu ofisial, iha oras 48 liu, depende bá evolusaun situasaun. Situasaun sé kalma nune’e entaun ami retira totál,” Tenente Jenerál Falur Rate Laek afirma.

“Kona-bá kazu Viqueque, ha’u koalia bebeik, ne’e teste boot bá ami, mais buat ne’e, moras irreditáriu, ne’e hanesan, tempu barak ne’e, ida ne’ebá mak soma liu. Mais ida-ne’e la signifika altera situsaun hotu. Ne’ebé, mais iha ne’ebá, atuasaun polísia ho F-FDTL nian, sira-nia kooperasaun di’ak, apoiu malu, kompleta malu, alende kompleta malu, populasaun mós gosta,” Falur Rate Laek hateten.

FALINTIL-Forsa Defeza Timor Leste (F-FDTL). Foto/Elio dos Santos da Costa

Kona-bá atu halo diálogu ho populasaun sira iha Viqueque, Falur hatutan, ne’e hanesan meiu ida de’it ne’ebé mak sira hala’o tiha ona. Maibé, sé mak sente aan komete iha krime sira-ne’e mak la koopera justisa bá nia iha nafatin.

“Ha’u aproveita, lori komandu konjunta ninia naran para agradese forsa tarrefas rua ne’ebé iha, Polísia ho F-FDTL ne’ebé iha terrenu, agradese bá sira-nia esforsus no sakrifísiu no empeñamentu, dedikasaun ne’ebé sira halo, nivel hothotu, iha área hothotu ne’ebé de’it, ami nia agradesimentu tomak, fó parabens bá sira, obrigadu bá sira, ida-ne’e mak ita presiza kaer bá malu,” Falur Rate Laek tenik.

PNTL Aumenta Forsa

Advertisement

Iha fatin hanesan, Komandante Jerál Polísia Nasionál Timor-Leste (PNTL), Komisáriu Polísia Henrique da Costa afirma, PNTL sei aumenta tán ninia membru iha Munisípiu Viqueque hodi nune’e, bele fó liután seguransa bá populasaun sira, no halo prevensaun bá krime ruma, karik mosu tán.

“Agora buat la’o normál, sira sei nafatin mantein sira-nia seguransa iha munisípiu, balu fila ona, maibé, hanesan dadauk iha Munisípiu Viqueque ita sei aumenta tán ita-nia rekursu, para atu nune’e, hodi hola medida prevensaun,” hateten Komisáriu jerál Polísia Henrique da Costa.

Komandante Henrique informa mós katak, situasaun seguransa iha rai-laran, oras ne’e la’o kontroladu, la’ós de’it iha kampaña, maibé mós bá to’o iha loron votasaun ninian. Situasaun pozitivu ida-ne’e, hatudu katak, komunidade sira rasik no povu Timor-Leste tomak konsiente ona katak, atu dezenvolve nasaun ne’e presiza estabilidade.

Jornalista: Rogério Pereira Cárceres

Advertisement