Hatutan.com, (25 Maiu 2023), Díli—Partidu Demokrátiku (PD), seidauk halo deklarasaun ofisiál kona-bá desizaun atu halo koligasaun tanba sei hein prosesu apuramentu iha Comissão Nasionál das Eleições (CNE) no validasaun ba rezultadu eleisaun Parlamentár hosi Tribunál Rekursu (TR).

Prezidente Demokrátiku (PD), Mariano Assanami Sabino ko’alia bá média hafoin hamutuk ho estrutura hasoru-malu ho Prezidente Repúblika, José Ramos-Horta iha Palásiu Prezidensiál Nicolau Lobato Bairru-Pité, Kinta (25/05/2023). Foto/Média PR.

Prezidente Partidu Demokrátiku, Mariano Assanami Sabino hateten, sei hein hela rezultadu hosi CNE nian, kontajen sei la’o hela, hein tempu atu Tribunál Rekursu anunsia.

Lee Mós: Xanana ho CNRT Seidauk Bele Ko’alia Forma Governu

“Ita hotu tenke hein prosesu, buat hotu-hotu la’o tuir legalidade. Gradualmente ne’e ita tenke respeita prosesu ne’ebé sei finál iha Tribunál Rekursu,” Mariano Assanami Sabino hateten hafoin ho estrutura hasoru-malu ho Prezidente Repúblika, José Ramos-Horta iha Palásiu Prezidensiál Nicolau Lobato Bairr-Pité, Kinta (25/05/2023).

Advertisement

Membru ne’ebé PD prepara tenke iha méritu ne’ebé la sukat de’it tanba nia universidade ka mestradu ka doutoramentu, maibé méritu katak iha kapasidade, nia iha koñesimentu kle’an atu aposta ba Estadu hodi bele lori Estadu ne’e la’o ba oin.

Asuntu kona-bá koligasaun depois mak ko’alia bainhira partidu vensedór iha ona, ko’alia koligasaun mak bai-bain ema ko’alia primeiru ko’alia kona-bá kompromisu, programa, no kona-bá ema maibé ne’e hotu la’ós tempu atu ko’alia agora.

Kona-bá ne’e, Prezidente Repúblika, José Ramos-Horta hateten, laiha partidu ida ne’ebé pelumenus seidauk rona rezultadu konfirmadu hosi Tribunál Rekursu (TR) tanba ne’e sei semana ida tán, maibé tuir observasaun, dadus hotu-hotu laiha partidu ida manán maiória absoluta.

Partidu ne’ebé maski manán maioria absoluta buka konvida partidu ida ka rua hodi forma Governu atu bele hetan maioria bo’ot liu, bele hametin liu tán estabilidade rai laran hodi garante dezenvolvimentu ba povu.

“Purtantu, CNRT mak iha oin, há’u konfia maun bo’ot Xanana oras-ne’e daudaun ko’alia iha partidu nia laran, estuda, haree oinsá sé mak atu bolu ba forma koligasaun. Solusaun úniku viável maka ida ne’e, CNRT ho partidu ida ka rua tan, ka ida de’it mós sufisiente, maibé há’u haree tanba situasaun dezafiu bo’ot ba rai ida ne’e,” Ramos-Horta, hateten.

Advertisement

Líder tenke hatudu nia matenek, nia vizaun oinsá halibur hotu-hotu atu governu forte, Parlamentu Nasionál unidu atu rai ne’e bele haksoit ba oin.

Dezafiu bo’ot adezaun TL ba ASEAN, servisu todan loos, servisu sei todan loos atu halo rekoperasaun ekonómika, no labele hanoin atu gasta de’it osan, gasta osan tenke iha retornu, tenke produtivu.

Jornalista: Vito Salvadór

Advertisement