Hatutan.com, (02 Juñu 2023), Díli—Polísia Nasionál Timor-Leste (PNTL), Komandu Munisipiu Covalima ho Unidade Espesial Polísia (UEP), liuhosi Batalhão Ordém Pública (BOP), kaptura suspeitu na’in-ualu (8), tanba involve iha kazu konfrontu ne’ebé akontese iha Suku Taz-Hilin, Postu Administrativu Zumalai, Munisipiu Covalima.

Suspeitu sira ne’e deskonfia mai hosi membru Grupu Arte Marsial (GAM), Persaudaraan Setia Hati Terate (PSHT) ho Kmanek Oan Rai Klaran (KORK).

Lee Mós: Konfrontu Hudi-Laran, Polísia Detein Joven Ida no Vitima Balun Hato’o Ona Keixa

Advertisement

Kronolojia akontesimentu hosi kazu insidente ne’e, akontese iha Segunda (29/05/2023), hale’u tuku 21:11 kalan Otl, joven lubuk ida hosi GAM PSHT bá konsentra iha sira-nia maun-alin ho naran inisial PDA ninia uma, iha aldeia Galitas, Suku Taz-Hilin, Postu Administrativu Zumalai.

Iha sira-nia konsentrasaun kalan ne’e, suspeitu sira hemu tua to’o lanu, ikus mai halo perturbasaun bá ordén públika hodi asalta ema nia sermónia festa inagurasaun ida ne’ebé iha mós área Galitas nian.

Rezultadu hosi konfrontu ne’e, suspeitu sira ta’a kanek vítima ida ho inisial FA, estraga uma komunidade nian hamutuk 10, motor 5, kioske 3, harahun parabola 4, armáriu 4, inklui hadau no lori halai sasan importante sira seluk ne’ebé durante kióske na’in tau iha laran.

Komandante Jerál Polísia Nasionál Timor-Leste (PNTL), Komisariu Jerál Polísia, Herique da Costa informa, hafoin kazu konfrontu ne’e akontese, Komandu PNTL Munisipiu Covalima ho Unidade Espesial Polísia, liuhosi Batalhão Ordém Pública (BOP), buka tuir kedan suspeitu sira-ninia paradeiru to’o kaptura duni suspeitu hamutuk na’in-8.

“Ita-nia parte patrolla atende kedan no horisehik konsege foti ona suspeitu na’in-ualu. Agora daudaun iha ona Komandu Munisipiu Covalima,” Herique da Costa hateten iha Kuartél Jerál Caicoli, Sesta (02/06/2023).

Advertisement

Maske nune’e, komisáriu Henrique dehan, PNTL sei kontinua buka tuir tán suspeitu sira seluk ne’ebé karik deskonfia envolve hotu iha kazu ne’e. Uainhira hetan, polísia sei bolu hotu, no lori bá halo prosesu identifikasaun.

“Iha tempu badak sira aprezenta aan iha Komandu  Munisipiu  Covalima para nune’e kontinua nian prosesu. Kuandu sira la aprezenta aan ne’e, ita sei promove sira ba Ministeriu Públiku hodi husu mandandu detensaun ba sira atu nune’e detein sira ba sala detensaun Komandu Munisipiu Covalima,” Komisariu Jerál Herique da Costa hateten.

Komandu PNTL mós halo ona koordenasaun no komunikasaun ho dirijente Komisaun Reguladora Arte Marsiál (KRAM), inklui responsável grupu sira ne’e atu buka solusaun lalais problema sira ne’e.

Atu evita konfrontu sira hanesan ne’e Komandane Jerál PNTL ne’e  husu ba  líder artee marsiál sira tenke kontrola nia elementu no joven sira tenke hadomi malu.

Jornalista: Rogério Pereira Cárceres

Advertisement