Hatutan.com, (02 Juñu 2023), Díli-Polísia Nasionál Timor-Leste (PNTL) Departamentu Investigasaun Kriminál (DIK) nia  ofisiál investigasaun hamutuk na’in-hitu (7) konklui formasaun iha area forensik.

Lee Mós : PNTL Díli Sei Intensifika Operasaun iha Tempu Kalan

Formasaun kona-bá investigasaun kriminál nian ne’e fasilita hosi fornadór sira Polísia Federal Austrália iha Programa Dezenvolvimentu Polísia Timor-Leste (TLPDP-silga Inglés), durante semana ida ne’ebé hala’o iha Kuartel Jerál PNTL, Caicoli, Díli.

Na’in bá Software “Forensick Comparation Software”hosi TLPDP, John Moloney. Foto/Elio dos Santos da Costa

Matéria ne’ebé ofisial investigasaun kriminál sira ne’e hetan relevante liubá oinsá mak atu halo deskobrimentu bá autór ka suspeitu sira ho laís. Tanba esperiénsia iha Timor-Leste  kazu krime barak akontese, maibé autoridade polísial sira la konsege identifika suspeitu tanba lakohi koopera ho Polísia.

Formasaun ne’e importante bá PNTL ninia membru sira iha DIK hodi hasa’e sira-ninia koñesimentu iha parte kriminál ninian. 

Komandante Jerál PNTL, Komisáriu Henrique da Costa, konsidera, formasaun ne’e importante no ohin membru sira na’in-7 konklui duni formasaun iha área forensik nian, utiliza sistema dijitál ho software “Forensick Comparation Software” (Software atu halo komparasaun forensik nian).

Komandante Henrique dehan, liuhosi formasaun ida-ne’e bele ajuda  membru PNTL sira bainhira sira foti evidénsia ruma hosi terrenu, depois lori mai, sira análiza,  estuda, depois hatama fila-fali bá iha komputadór, hodi haree, apár, halo komparasaun, hafoin sira bele aprezenta ona ninia rezultadu ne’e bá iha ministériu públiku.

Formasaun ida ne’e, atu hodi kompleta tán de’it buat ne’ebé mak uluk membru sira iha tiha ona. PNTL mós hetan apoiu hosi asesór ida hosi parte TLPDP, Polísia Federal Austrália nian, inklui staff lokál na’in-rua, ida hanesan tradutór, ida tán hanesan ajuda PNTL parte forensik sira hodi halo identifikasaun.

“Sira apoiu ho ekipamentus lubuk ida, ita bele hatete katak, sufisiente para atu halo kna’ar ida ne’e. Mais, ida ita haree buat ne’ebé maka seidauk kompleta depois komandu bele buka,” Henrique da Costa tenik.

Na’in bá Software “Forensick Comparation Software”hosi TLPDP, John Moloney afirma, Polísia Federal Austrália, hakarak duni atu hasa’e kapasidade polísia lokál nian iha rejiaun ne’e.

“Teknolójia ida ne’ebé maka agora dadauk ami lori mai iha ne’e, teknolójia ida ne’ebé  uza iha Austrália, inklui mós ajénsia sira seluk ne’ebé uza iha mundu. Uluk, ha’u mós polísia, ne’ebé, ha’u kria software ida ne’e, bainhira ha’u sei iha polísia. Tanba ne’e maka, ha’u haksolok tebes, ha’u hakarak partilla software ida ne’e bá polísia sira seluk,” John Moloney. hateten

John Moloney fiar katak, ho formasaun ida ne’e sei avansa no sei hasa’e kapasidade polísia Timor-Leste nian.

“Ne’ebé, sira gosta tebes. Entaun, teknolójia ida ne’e, ita bele apár (kecocokan). Ne’ebé liman fatin ne’ebé ke rekolla iha lokál do kríme mai, ita bele sinkroniza ho finger print ne’ebé mak iha ona sistema ida ne’e. Entaun, rua-rua ne’e bele halo sinkronizasaun,”

John Moloney hatutan, bainhira membru PNTL sira utiliza ona teknolójia ida-ne’e sei bele rezolve krime barak liután, no ida sei sai di’ak mós bá komunidade Timor-Leste.

Jornalista: Rogério Pereira Cárceres