Hatutan.com, (06 Juñu 2023), Díli—Prezidente Parlamentu Nasionál (PPN), Aniceto Longuinhos Guterres Lopes sei konsulta ho líder bankada asentu Parlamentár sira molok halo desizaun, maibé ba interesse Estadu no país ida-ne’e nia konkorda ho Prezidente Repúblika, José Ramos-Horta atu fó posse bá membru VI lejislatura iha fulan Juñu tinan ne’e.

Aniceto Guterres ko’alia asuntu ne’e hafoin enkontru ho Prezidente Repúblika, José Ramos-Horta iha Palásiu Prezidensiál Nicolau Lobato, Bairru-Pité, Tersa (06/06/2023).

Lee Mós: Prezidente Repúblika Prefere Posse Urjente Bá Membru PN Iha Juñu

Advertisement

“Sorumutu ho Prezidente Repúblika ko’alia kona-bá transferénsia V lejislatura ba VI lejislatura. Tuir rejimentu tenke hahú ho primeira reuniaun. Agora, atu realiza primeira reuniaun ne’e bainhira no iha interpretasaun diferente. Ha’u ho Prezidente Repúblika iha interpretasaun diferente. Biar diferente, maibé tanba interese Estadu nian no atu prosesu sira bele la’o, ha’u tuir interpretasaun Xefe Estadu nian,” nia hateten.

Aniceto tuir de’it Xefe Estadu nia interpretasaun, signifika loron 15 depois validasaun rezultadu hosi Tribunál Rekursu prazu másimu ida-ne’e, tenke realiza ona primeira reuniaun.

“Entaun, biar ha’u la konkorda ho Prezidente Repúblika ninia interpretasaun ba interese Estadu nian, ha’u konkorda atu realiza dentru prazu legál ida-ne’e, no ha’u sei ba konsulta ho líder bankada Parlamentares atu fiksa data ida ezatu bá dentru prazu legál ida-ne’e,”  nia esplika.

Maski prosesu sira tuir mai sei iha resesu bá membru PN atuál, maibé sei tenta atu halo másimu possível oinsa bele la’o tuir Estadu nia interese.

Tribunál Rekursu valida no pronunsia ona kona-bá rezultadu eleisaun Parlamentár 2023, iha Segunda (05/06/2023).

Advertisement

Jornalista: Vito Salvadór