Hatutan.com, (19 Juñu 2023), Díli— Telekomunikasi Indonesia International (TL), S.A. (Telkomcel) nu’udár operadór telekomunikasaun ne’ebé iha komitmentu atu kontribui ba dezenvolvimentu nasaun liu hosi infraestrutura telekomunikasaun, rekursu umanu, desportu, turizmu, sosiál no kultura.

CEO Telkomcel, Benedictus Ardiyanto Priyo Partisipa iha abertura Kopa FFTL – Telkomcel tinan 2023 iha Gleno, Segunda (19/06/2023). Foto/Telkomcel.

Telkomcel antes ne’e kolabora ho Federação Futebol Timor-Leste (FFTL) iha inisitiva hodi hasa’e joven lokál sira nia talentu hodi dezenvolve sira nia an liu hosi disportu.

Lee Mós: Hatutan.com Manán Prémiu Produtu Jornalístiku Di’ak Liu Kona-bá Tinan-10 Telkomcel

Iha tinan 2019, servisu hamutuk hodi realiza FFTL – Telkomcel Cup bele lori jogadór foinsa’e Timor oan ba Mundu Internasionál.

Atividade jogu futeból antes ne’e hahú ona iha rejionál 3 iha Timor-Leste mak hanesan Baucau, Manufahi no Maliana ne’ebé hetan apoiu hosi NWTL (Fonehouse, Mintt, TL Sport, Mandiri no Pertamina International (PITSA).

Ho situasaun Covid-19 iha tinan 2020, atividade hotu labele halo movimentu to’o tinan 2021 no iha loron 15 Juñu 2023 foin bele reativa fali atividade Kopa Telkomcel – FFTL iha munisipiu Ermera hodi hatudu joven talentu lokál sira ba dezenvolvimentu talentu iha desportu.

“Telkomcel nia prezensa iha eventu obertura Kopa FFTL – Telkomcel tinan 2023 ne’ebé realiza iha Gleno – Ermera tanba komitmentu Telkomcel nian, atu kontinua apoia juventude Timor-Leste liu hosi jogu futeból nune’e joven sira hatudu ba mundu katak sira mós bele kompete iha jogu internasionál,” Hatutan.com sita deklarasaun CEO Telkomcel, Benedictus Ardiyanto Priyo iha komunikadu, Segunda (19/06/2023).

Prezidente Federasaun Futebol Timor-Leste (FFTL), Francisco Jeronimo hateten, objetivu hosi jogu ne’e hanesan oportunidade bo’ot ba joven sira hodi kontribui ba dezenvolvimentu desportu nasaun nian.

Resultadu hosi jogu antes, konsege hetan ona jogadór sira balun ne’ebé bele reforsa ona ekipa nasionál Timor-Leste nian no jogadór Paulo Gali Freitas agora hetan ona kontratu hosi PSSI Semarang Indonesia.

Partisipante ne’ebé hola parte iha eventu ne’e mai hosi munisípiu 11.

Jornalista: Rogério Pereira Cárceres