Hatutan.com, (01 Jullu 2023), Díli- Asosiasaun Futeból hamutuk 16 ezije Kongresu Estraordináriu  hodi troka Prezidente Federasaun Futebol Timor-Leste (FFTL), Francisco Martins da Costa Pereira Jerónimo.

Lee Mós : Francisco Jerónimo Re-eleitu Ba Prezidente FFTL 2022-2026

Kongresu Ordinariu FFTL iha novo Turizmu, Díli, Sábadu (01/07/2023). Foto/Vito Salvadór

Liuhosi kongresu ordináriu   FFTL nian ne’ebé hala’o iha Otél Novo Turizmu, Sábadu (01/07/2023), portavós asosiasaun 16, Hipólito Soares, afirma asosiasaun futeból 16 ezije kongresu estraordináriu tanba durante ne’e prezidente FFTL, Francisco Martins da Costa Pereira Jerónimo, la kumpre nia kompromisu ne’ebé hala’o iha kongresu FFTL nian iha tinan 2022.

Liuhosi kongresu nasionál FFTL bá da-hitu iha loron 26 fulan-Fevereiru 2022 iha Otél Novo Turizmu, Francisco Jerónimo re-eleitu nu’udár prezidente FFTL bá períodu 2022-2026, ho votu 11 no nia adversáriu Nilton Gusmão hetan votu 10 liuhusi votasaun iha segunda ronde.

Lee Mós : Francisco Jerónimo Promete Mellora Futeból TL

Francisco Jerónimo nia kompromisu iha kongresu nasionál FFTL tempu ne’ebá mak;

• Fó prioridade bá hadi’a kampu futeból sira hod di’ak tuir padraun internasionál
• Hamoris Liga Futeból Feto to’o iha munisípiu sira hotu
• Kopa FFTL fó oportunidade bá joven sira iha munisípiu hotu mak kompete, la’ós klube sira iha primeira divizaun ho segundu divizaun de’it mak kompete
• Tau importánsia bá nivel infraestrutura asosiasaun futeból ho asosiasaun futeból munisípiu sira
• Futeból juveníl la’o iha munisípiu kada tinan
• Treinamentu bá juveníl hosi tinan ualu (8) to’o tinan 12 tenke la’o maka’as
• Formasaun bá arbitrajen iha nivel nasionál no munisípiu tenke kontínua
• Kontínua apoiu Liga  Futeból Timor Leste
• Jogu terseira divizaun tenke hala’o iha munisípiu hodi mai kompete segundu divizaun iha Díli
• No seluk-seluk tan.

Ezijénsia bá Kongresu Estraordináriu ne’e membru Asosiasaun sira hatoo liuhosi votasaun bá alterasaun ajenda Kongresu Ordináriu FFTL bá dala-ualu ne’ebé hala’o iha Otél Novo Turizmu.

Iha prosesu votasaun Prezidente FFTL, Francisco Martins da Costa Pereira Jerónimo husu ba kongresista sira atu halo votasaun hodi hili afavor no alterasaun, husi rezultadu votasaun hatudu maioria hosi membru Asosiasaun sira ne’ebé partisipa iha Kongresu Ordináriu FFTL ne’e maioria hili atu halo alterasaun bá ajenda no propoin kedas Kongresu estraordináriu ho maiória, no total votu 16. Entertantu iha deit Asosiasaun lima mak a-favor bá ajenda kongresu ho ida ne’e.

Kongresu Ordináriu FFTL bá dala-ualu la kontínua, tamba ajenda ne’ebé preparadu hetan rejeisaun no altera kedas ho ajenda Kongresu Estraordináriu ne’ebé maioria Asosiasaun propoin.

Kona-bá Kongresu Estraordináriu sei hein komunikasaun hosi parte ezekutivu FFTL halo ho FIFA hafoin sei anúnsiu hikas rezultadu bá Asosiasaun sira, no tuir Estatutu FFTL artigu 33, prazu bá Kongresu Estraordináriu iha loron 90 ka fulan tolu nia laran.

Kongresu Ordinariu FFTL iha novo Turizmu, Díli, Sábadu (01/07/2023). Foto/Vito Salvadór

Portavóz asosiasaun 16 ne’ebé ezije kongresu estraordináriu, Hipólito Soares afirma, asosiasaun hamutuk sanulu resin neen (16) ne’ebé ohin husu Kongresu Estraordináriu tamba hakarak mudansa iha FFTL.

Ezijensia ba Kongresu Estraordináriu ne’e ho razaun durante ne’e Asosiasaun sira haree katak lideransa FFTL aktual laiha kapasidade atu ezekuta programa sira ne’ebé iha hodi lori dezenvolvimentu Futeból iha Timor-Leste.

Ezijénsia ne’ebé Asosiasaun sira halo bazeia bá Estatutu FFTL artigu 33, ne’ebé hateten katak bainhira hakarak iha mudansa bá estrutura FFTL tenke liu husi dalan úniku no as liu mak Kongresu Estraordináriu.

“Ami hato’o pasifikamente katak ami hakarak Kongresu Estraordináriu. Ami nia proposta bá loron 01 fulan-Setembru 2023, maibé sei hein husi FIFA. Hakarak mudansa tenke iha lalais Kongresu Estraordináriu,” Hipólito Soares haktuir bá jornalista sira.

Prezidente Asosiasaun Díli Oeste ne’e subliña durante ne’e públiku hatene momos no akompaña katak durante períodu rua lideransa FFTL lahatudu prestasaun servisu ne’ebé diak tuir espetativa publiku hadomi Futeból nian tamba Liga Futebol profesional lao latuir kalendariu FIFA, jogu juvenil laiha, Asosiasaun sira kuaze fulan neen mak hetan subsídiu, no komprimisu sira bá Liga Futeból primeiro divizaun, segunda divizaun to’o Kuarta divizaun ne’ebé sei hahú husi munisípiu mai Nasionál la realiza.

Nia argumenta mos katak liga Futeból Timor-Leste ne’ebé iha tinan kotuk realiza ho períodu fulan rua ne’e akontese tamba ezijensia no esforsu sira hosi klubu la’ós federasaun.

“Laos ita lagosta se, la gosta Prezidente FFTL ka Sekretáriu Jerál, mais ami asosiasaun toma responsabilidade atu halo mudansa, se ami nonok de’it mós públiku sira sei kestiona, tamba ne’e ami mai ho dalan ida legal atu halo mudansa mak Kongresu Estraordináriu,” Hipólito Soares afirma.

Nia hatutan Asosiasaun sira sei halo follow-up ba iha parte ezekutivu FFTL atu bele realiza Kongresu Estraordináriu ne’e ohin hetan ona aprovasaun iha Kongresu Ordináriu FFTL ba dala-ualu ne’e.

Prezidente FFTL, Francisco Martins da Costa Pereira Jerónimo iha nia intervensaun durante diskusaun bá ajenda kongresu Ordináriu FFTL ba dala-ualu hateten, se Asosiasaun ka kongresista sira maiória la konkorda ho ajenda Kongresu Ordináriu, ohin loron nian no hili ba Kongresu Estraordináriu prontu aprezenta ajenda ba.

“Há’u mós lakohi ita halo diskusaun naruk hodi  dada tempu, prontu fó tempu bá ami ezekutivu halo komunikasaun ho parte FIFA tamba bá Kongresu Estraordináriu presiza osan no osan ne’e mai hosi FIFA,” Francisco Martins da Costa Pereira Jerónimo hateten.

Asosiasaun sira ne’ebé partisipa iha Kongresu Ordináriu FFTL ba dala-ualu mak hanesan Asosiasaun Futeból Dili Leste, Asosiasaun Futeból Díli Oeste, Asosiasaun Futeból Manufahi, Asosiasaun Futeból Manatuto, Asosiasaun Futeból Baucau, Asosiasaun Futeból Lautém, Asosiasaun Futeból Viqueque, Asosiasaun Futeból Ermera, Asosiasaun Futeból Likisa, Asosiasaun Futeból Bobonaro, Asosiasaun Futeból Covalima, Asosiasaun Futeból Aileu, Asosiasaun Futeból Ainaro, Asosiasaun Futeból Oe-cusse, Asosiasaun Arbitragem, Asosiasaun Treinador, Asosiasaun Futsal, Asosiasaun Feto, Asosiasaun Juvenil, Kampiaun Primeiru Divizaun Karketu Díli FC no kampiaun segunda divizaun DIT FC. 

Lee Mós : Deskonfia, Ezekutivu FFTL Balun Subar Amante 

Lee Mós : Deskonfia, MAPKOMS Nu’udar Prezidente FFTL Fó Projetu iha RTTL,E.P Ba Sekretaria FFTL

Jornalista: Vito Salvadór