Hatutan.com, (03 Jullu 2023), Díli—Xefe Estadu Maior FALINTIL Forsa Defeza Timor-Leste (F-FDTL), Tenente Jenerál Domingos Raul ‘Falur Rate Laek’ husu bá Ministru Defeza foun, Donaciano do Rosário Gomes ‘Pedro Klamar Fuik’, atu iha ninia mandatu ne’e tenke prioritiza dezenvolvimentu no moris di’ak Forsa Armada.

Falur Rate Laek husu ne’e, hafoin ho Vise Xefe Estadu Maiór F-FDTL, Brigadeiru Jenerál Calisto Santos ‘Coli-Coliati’, simu vizita hosi Ministru ‘Pedro Klamar Fuik’, iha Kuartél Jenerál F-FDTL, Fatuhada, Segunda (03/07/2023).

Lee Mós: Diskursu Kompletu Prezidente Repúblika Iha Posse IX Governu

“Ministru Defeza mai komprimenta ami na’in-rua, aprezenta aan dehan katak nia bá assume kargu nu’udár ministru ona, simu ona posse. Ami ko’alia oitoan kona-bá situasaun jerál Forsa nian. Ami mós ko’alia kona-bá atu halo saida mak bele servisu, hadi’a instituisaun ninian,” Tenente Jenerál Falur Rate Laek hateten.

Iha sorumutu entre sira na’in-tolu ne’e ko’alia kona-bá prioridade sira saida mak bá oin tenke mellora iha Forsa Armada.

“Prioridade liu maka bá infra-estrutura sira, apoiu sosiál bá Forsa nia família, nune’e Forsa labele bá mete-tun, mete-sa’e, labele halo tun, halo sa’e, labele bá falta, labele halo problema sira ne’e. Ne’e prioridade sira ne’ebé mak ida bem-estár liu ne’e, sosiál Forsa ninian,” Komandante Falur Rate Laek hateten.  

Harii Bairru Militár

Iha mandatu Ministru Defeza foun ne’e nian, Komandu F-FDTL husu atu kontinua prevee orsamentu bá harii bairru militár nian, bá militár sira.

Molok ne’e mós, parte komandu identifika ona fatin ka rai balun iha área Beduku, Suku Manleuna, Postu Administrativu Dom Aleixo, atu oinsá bele harii bairru militár bá militár hirak ne’ebé servisu iha Kuartel Jenerál nian.

“La’ós Beduku de’it, Dame-Lara ne’ebá ne’e, ohin ha’u dehan atu halo investigasaun, kompañia sira ne’ebé kuandu sira halo buat lahun la-dikin ne’e, prosesa sira, tuir lei ne’ebé mak iha,” Falur fó atensaun.

Jornalista: Rogério Pereira Cárceres