Hatutan.com, (06 Jullu 2023), Díli—Komandu FALINTIL Forsa Defeza Timor-Leste (F-FDTL) liuhosi sorumutu membru Konsellu Superiór Militár nian iha Kuarta (28/06/2023), deside ho votu maioria hodi hili Koronél José da Costa Soares ‘Trix’ hodi substitui Komodoro Donanciano da Costa Gomes ‘Pedro Klamar Fuik’, bá Xefe Estadu Maior F-FDTL.

Koronél José da Costa Soares ‘Trix’. Foto/F-FDTL.

Razaun hili Koronél  ‘Trix’ ne’ebé durante ne’e assume responsabilidade nu’udár komandante iha Komponente Terrestre iha lanud, Baucau ne’e tanba Komodoro Pedro Klamar Fuik hetan fiar hosi eis Komandante En-Xefe FALINTIL, Kay Rala Gusmão atu assume pozisaun nu’udár Ministru Defeza (MD) iha IX Governu Konstitusionál.

Lee Mós: Falur Husu Pedro Klamar Fuik Prioritiza Dezenvolvimentu no Moris Di’ak Forsa Armada

Xefe Estadu Maiór Jenerál F-FDTL, Tenente Jenerál Domingos Raúl ‘Falur Rate Laek’ esplika, proposta nomeasaun bá Xefe Estadu Maiór F-FDTL foun ne’e Komandu F-FDTL enkamiña ona bá atuál Ministru Defeza (MD), Donanciano Gomes ‘Pedro Klamar Fuik’ atu lori bá aprezenta no diskute iha sorumutu Kosellu Ministru nian, hafoin ida ne’e tuir Lei, Governu sei aprezenta bá Prezidente Repúblika (PR), Ramos-Horta atu foti desizaun.

“Propósta ha’u haruka ona bá Ministru Defeza atuál atu aprezenta bá Governu, nune’e Governu aprova iha Konsellu Ministru hodi aprezenta ba Prezidente Repúblika atu halo nomeasaun ba Xefe Estadu Maiór Jenerál F-FDTL foun Koronél Trix,” Falur Rate Laek hateten iha Kuartél Jenerál F-FDTL,  Fatuhada, Kinta (06/07/2023).

Koronél ‘Trix’ nu’udár militár ida ne’ebé iha kapasidade di’ak no iha kresimentu forsa nian, iha fé atu kontinua dezenvolve instituisaun Forsas Armadas ne’e bá oin.

Haree bá esperiénsia, Koronél ‘Trix’ uluk mós halo parte ona iha Estadu Maiór, tanba ne’e nia hatene situasaun hotu, nia ema ida abilitadu no ema matenek.

“Ohin loron konjuntura atuál nasionál ne’e ita bele dehan tranferénsia ne’e tenke ema ne’ebé kaer atu dezenvolve rai ida ne’e. Ema hotu-hotu tenke iha kapasidade akadémiku profisionál, ema inteletuál atu bele dezenvolve instituisaun ne’e ba oin,” Falur Rate Laek hateten.

Haree bá istória no partisipasaun iha luta libertasaun nasionál, Koronél  ‘Trix’, ema ida mós gerilleiru, ne’ebé uluk hanesan Kolaboradór Estadu Maiór FALINTIL nian iha ai-laran  no veterenu.

Tris ema ida ne’ebé iha esperiénsia tanba frekuenta formasaun barak no nia mós militár ida ne’ebé kleur liu iha instituisaun F-FDTL.

Tanba ne’e mak Konsellu Superiór Militár vota pur unanimilidade hodi nomeia no halo promosaun bá Xefe Estadu Maiór hodi assume pasta ida-ne’e to’o nia reforma dentru tinan rua.

Haree bá desizaun sira hosi Konsellu Superiór militár nian, maka Tenente Jenerál Falur, bolu ona mós Koronel ‘Trix’ atu assume kna’ar nu’udár Xefe Estadu Maiór Jenerál F-FDTL interinu hodi hein desizaun ofisiál hosi Xefe Estadu Ramos-Horta.

Komandante Falur Rate Laek la dúvida ho kapasidade ne’ebé Koronél ‘Trix’ iha, tanba ne’e nia parte depozita konfiansa tomak, tanba nia mós ema ne’ebé mak hola parte maka’as iha ezisténsia no dezenvolvimentu F-FDTL durante tinan 20-resin.

Nomeia Koronél ‘Dobu’ ho Tenente Koronél ‘Nicky’

Ho mudansa no substituisaun bá kargu sira ne’e, iha biban hanesan Tenente Jenerál Falur Rate Laek, nomeia ona mós Koronél Domingos da Costa Soares ‘Dobu’ bá lidera fali Komponente Terestre (CT-Sigla Português) nu’udár komandante interinu hodi substitui Koronél ‘Trix’.

Alende ne’e, nomeia mós Tenente Koronél Abel da Costa Xavier ‘Nicky’, atuál Komandante Unidade Polísia Militár bá lidera fali Unidade FALINTIL nu’udár komandante interinu.

Tui Lei númeru 3/2010, 21 abril, kona-bá Lei bá Defeza Nasionál nian, iha artigu 14 alinea (f), Prezidente Repúblika mak nomeia no ezonera Xefe Estadu Maiór Jenerál sira Forsa Armada nian.

Artigu 17 alineia D hosi Lei ne’e hateten, proposta nomeasaun bá Xefe Estadu Maiór Jenerál Forsa Armada, Vise Xefe Estadu Maiór Jenerál no Xefe Estadu Maiór inklui Komandante Komponente sira, sei aprezenta hosi responsável membru Governu ne’ebé reponsável bá Ministru Defeza, propoin bá  Governu hodi halo aprovasaun iha Konsellu Ministru.

Jornalista: Rogério Pereira Cárceres