Hatutan.com, (04 Jullu 2023), Díli- Ministra Finansas (MF), Santina José Rodrigues Ferreira Viegas Cardoso, hateten Ministériu Finansas nia prioridade bá loron 120 mak  fó importánsia bá programa Governu nian no orsamentu ratifikativu.

Lee Mós : Loron 120 Rezolve Kadernéta Pasaporte Timor-Leste

Ministra Finansas (MF), Santina José Rodrigues Ferreira Viegas Cardoso. Foto/Elio dos Santos da Costa

Ministra Finansas (MF), Santina José Rodrigues Ferreira Viegas Cardoso, hateten hahú Segunda, 03 fulan-Jullu 2023, iha reuniaun haree espasu fiskál  atu haree oinsa preparasaun ba orsamentu ratifikativu tuir ajenda no prióridade liu mak oinsa hare ba programa governu nian.

Konsellu Ministru deside atu foku uluk ba iha programa  Governu no agora dadaun Ministériu Finansas halo simultaneu katak servisu hela atu hare ba orsamentu ratifikativu no mos programa Governu.

“Iha loron 120 dahuluk programa Ministériu Finansas nia  foku liu mak programa Governu nian no orsamentu ratifikativu, inklui orsamentu jerál estadu tinan 2024,” Ministra Finansas (MF), Santina José Rodrigues Ferreira Viegas Cardoso bá jornalista sira iha Palásiu Governu, Tersa (04/07/2023).

Ministra Santina José Rodrigues Ferreira Viegas Cardoso hatutan, agora daudaun ema hotu no públiku hatene katak orsamentu jerál estadu tinan 2023 iha Billaun $ 2,1 ne’ebé hetan aprovasaun iha Parlamentu Nasionál, agora depende bá programa Governu nian atu bele ajusta ho orsamentu ne’ebé iha.

Nia hatutan, Governu seidauk iha planu atu bainhira mak sei lori orsamentu ratifikativu bá iha Parlamentu Nasionál tanba sei fó uluk prioridade bá programa hodi ajusta ho orsamentu ne’ebé Governu sei ezekuta tuir komprimisu polítiku ne’ebé iha.

Jornalista: Vito Salvadór