Hatutan.com, (07 Jullu 2023), Ainaro—Udan boot durante loron tolu, hahú hosi 03 to’o 05 fulan Jullu tinan ne’e, rezulta rai halai no rai monu hodi taka tomak estrada kuaze metru 50 iha aldeia Airaca-Lau, Suku Ai-Tutu, postu administrativu Maubisse, munisípiu Ainaro.

Udan boot durante loron tolu, hahú hosi 03 to’o 05 fulan Jullu 2023, rezulta rai halai no rai monu hodi taka tomak estrada kuaze metru 50 iha aldeia Airaca-Lau, Suku Ai-Tutu, postu administrativu Maubisse, munisípiu Ainaro, no komunidade susar atu asesu mai Díli, Sesta (07/07/2023). Foto/Elio dos Santos da Costa.

Situasaun ne’e halo movimentu transporte públiku diresaun Munisípiu Manufahi liga Postu Administrativu Maubisse, no liu mai Dili paradu totál.

Lee Mós: Dezastre Naturál Hamate Ema Na’in-20 no Estraga Uma 1.199

Informasaun ne’ebé Hatutan.com rekolla iha terrenu, iha loron 03 to’o 05 fulan jullu, akontese udan ho intensidade bo’ot iha kosta súl munisípiu Covalima, Manufahi no Ainaro, hosi intensidade udan ne’ebé boot rezulta mota tun no halo erozaun ka rai halai hodi taka tomak ponte Erbiur iha aldeia Airacalau no iha bee tudak Metloko iha Lihuntutu.

Xefe Suku Ai-Tutu, António Mendonça Pacheco hateten, erozaun ka rai halai iha parte mota Erbiur Airaca-Lau no iha bee tudak Metloko no iha Lihuntutu afeita tebes komunidade no halo movimentasaun transporte públiku diresaun Munisípiu Manufahi liga Postu Administrativu Maubisse paradu.

“Komunidade balun tenke la’o ain de’it hodi ultrapassa hosi sorin ba sorin liu hosi dalan alternativa ne’ebé iha. Karreta para hotu no sira lalin sasan liu hosi foho lolon hodi kontinua halo sira nia atividade, hodi bele sustenta sira nia família,” António Mendonça Paicheco ba Hatutan.com iha Mota Erbiur, aldeia Airakalau, suku Ai-Tutu, Sesta (07/07/2023).

Hanesan autoridade lokál halo ona servisu lubuk ida hodi koopera ho autoridade munisipál liu-liu ho Ministériu relevante sira hanesan Ministériu Obras Públiku liu husi IGEADI atu bele hala’o atendimentu hodi normaliza hikas estrada ne’ebé rai taka.

Autoridade ne’ebé servisu hamutuk ho komunidade fó ona rekomendasaun ba iha governu sentrál atu normaliza fila-fali estrada ne’e tau iha kondisaun nune’e labele fó impaktu ba komunidade, tanba ne’e estrada públiku no komunidade barak mak sempre utiliza hodi hala’o sira nia atividade hotu-hotu.

Kompañia Tinolina no King Construction hahú halo normalizasaun ba estrada ne’ebé rai taka kuaze metro 50 hafoin udan boot durante loron tolu, hahú hosi 03 to’o 05 fulan Jullu 2023, iha aldeia Airaca-Lau, Suku Ai-Tutu, postu administrativu Maubisse, munisípiu Ainaro, Sesta (07/07/2023). Foto/Elio dos Santos da Costa.

Iha fatin hanesan, Xefe aldeia Airakalau, Domingos da Silva Pacheco hateten, dezastre naturais rai halai no taka tomak estrada ne’e afeita tebes ba komunidade sira tanba ho situasaun ne’e halo komunidade labele asesu ba merkadu, ba fasilidade saúde, inklui sira nia atividade diária hanesan negósiu, tenke paradu maski sira balun halo esforsu liu hosi dalan alternativu sira hodi mantein atu bele hadi’a sira nia situasaun uma laran.

Autoridade lokál ne’e informa katak, oras-ne’e empreza Tinolina no King Construction mak hahú halo normalizasaun hodi hasai rai ne’ebé iha estrada klaran nune’e bele iha espasu atu komunidade bele hala’o hikas movimentu hanesan bai-bain.

Komunidade, José Pereira ne’ebé hela besik fatin akontesimentu hateten, iha lorin 04 fullan jullu liu ba iha dadersan de’it udan bo’ot, rai hahú monu hosi leten tun mai taka metin estrada no halo ponte kiik mota Erbiur nian lakon totál no bee hahú halai tuir estrada no invade komunidade nia uma ne’ebé besik.

Populasaun Suku Ai-Tutu, Postu Administravu Maubisse iha aldeia hamutuk sia mak hanesan Aldeia Aihou, Airaca-Lau, Betulala, Goulolo, Hatubuti, Lebututu, Lientutu, Mau-Lefo no Russulau ho total populasaun Feto no mane hamutuk 9.000, iha uma-ka’in besik-2.000, no aldeita Airaca-Lau rasik iha uma-ka’in 450.

Jornalista: Vito Salvadór & Lázaro Pereira Quefi