Hatutan.com, (12 Jullu 2023), Díli—Polísia Nasionál Timor-Leste (PNTL), liuhosi Departamentu Investigasaun Kriminál (DIK), kaer tán ona na’in bá ID Facebook ‘Ela Variana’, tanba lansa liafuan ameasa ne’ebé mak ofende lider nasionál no atuál Primeiru Ministru (PM), José Alexandre Kay Rala Xanana Gusmão, iha média sosiál facebook.

PNTL liuhosi Departamentu Investigasaun Kriminál (DIK), kaer ona na’in bá ID Facebook ‘Ela Variana’, tanba lansa liafuan ameasa ne’ebé mak ofende lider nasionál no atuál Primeiru Ministru (PM), José Alexandre Kay Rala Xanana Gusmão, iha média sosiál facebook, Iha Kuarta 12 jullu tuku 08:00 dadeer otl, iha ninia uma-hela fatin (uma aluga ka kost) besik Kampus UNPAZ área Manleuana, Suku Comoro, Postu Administrativu Dom Aleixo, Munisípiu Díli. Foto/Elio dos Santos da Costa.

Iha Kuarta, 12 jullu tuku 08:00 dadeer otl, ekipa Investigasaun Kriminál PNTL nian bá foti Ela Variana iha ninia uma-hela fatin (uma aluga ka kost) besik Kampus Universidade da Paz (UNPAZ) área Manleuana, Suku Comoro, Postu Administrativu Dom Aleixo, Munisípiu Díli.

Lee Mós: Polísia Kaer Ona Na’in Bá Konta Facebook ‘Jonn Malic’

Tuir informasaun hosi ekipa DIK nian katak, bainhira to’o iha uma-hela fatin Manleuana, Ela Variana la koopera ho PNTL, to’o haksesuk malu ho ajente PNTL sira kuaze minutu 20 nia laran.

Maibé, ikus mai sidadaun feto ne’e koopera, nune’e ekipa transporta kedan mai iha Kuartél Jerál PNTL, Caicoli iha tuku 10:00 dadeer otl.

Konteúdu mensájen sira ne’ebé hato’o hosi ID Facebook Ela Variana iha rede sosiál facebook hateten katak, “Prontu oho Xanana ne’ebé hahalok malkriadu bá inan feton sira ka la’e? Sé la brani, entaun, keta hatudu liman moos bá povu ki’ik ne’ebé hanesan ho ita-boot”.

Postájen iha leten, deskonfia iha relasaun ho atuasaun PNTL nian hasoru sidadaun MJ, nu’udár na’in bá ID Facebook ‘Jonn Malic’ ne’ebé ekipa Investigasaun Kriminál halo tiha ona identifikasaun iha Segunda foin lalais ne’e.

“Ita ezíje justisa! Sé de’it mak sala, tenke prosesu tansá, lider ne’e husik lívre,” ‘Ela Varian’ hateten tán iha rede sosial fecebook.

Oras-ne’e daudaun, Investigadór sira hala’o hela identifikasaun bá Ela Variana, hodi buka hatene didi’ak postájen sira ne’e ninian duni ka la’ós.

Bainhira rezultadu identifikasaun ne’e mak konklui katak, ‘Ela Variana’ mak na’in bá postájen hirak iha média sosial ne’e maka, investigadór sira kontinua kedan ho prosesu investigasaun kriminál hasoru sidadaun ne’e, liu-liu kona-bá motivu sira, tanba saida mak nia bele lansa informasaun krítika sira ne’ebé ‘la konstrutiva’, hasoru lider nasionál sira.

Iha segunda (10/07/2023) foin lalais, DIK mós halo uluk ona identifikasaun bá sidadaun mane ida ho inisial MJ, tanba deskonfia nu’udár na’in bá ID facebook ‘Jonn Malic’, ne’ebé durante uza hodi lansa mós liafuan aat hasoru PM Xanana Gusmão, iha média sosiál.

Ho prosesu identifikasaun sira ne’ebé PNTL halo ona bá sidadaun sira na’in-rua MJ (Jonn Malic) ho Ela Variana’ ne’e, Investigadór sira deskonfia katak, iha ona grupu organizadu ne’ebé durante ne’e sempre koordena malu hodi lansa má-informasaun oioin iha média sosiál, hasoru lider sira, liu-liu ofende Xefe Governu Kay Rala Xanana Gusmão.

Oras-ne’e daudaun, PNTL mós buka nafatin no buka namanas hela sidadaun sira ne’ebé gosta helik aan ho ID facebook falsu sira mak hanesan ‘Kontra Sira, Martinho Pereira, Fukun Timor News, inklui seluk tán, tanba durante ne’e sempre halo propaganda iha rede sosiál facebook, to’o hasai liafuan aat, hasoru lider nasionál sira alias lia-fuan “tolok”.

Jornalista: Rogério Pereira Cárceres