Hatutan.com, (11 Jullu 2023), Díli—IX Governu Konstitusionál liuhosi Ministériu Interiór (MI), sei dignifika hodi hadi’a fila-fali estatutu membru Polísia Nasionál Timor Leste (PNTL), reformadu na’in 158, liuliu haree hikas mekanizmu sira kona-bá reforma ne’ebé mak antes ne’e komandu PNTL ho VIII Governu halo ona konsidera la tuir regra.

Ministru Interiór, Francisco Guterres.

Ministru Interiór, Francisco Guterres halo ona sorumutu ho membru PNTL na’in-158 reformadu hodi esplika ba malu kona-bá mekanizmu sira reforma nian antes ne’e, iha akademia Polísia Comoro, Tersa (11/07/2023). 

Lee Mós: Membru PNTL Na’in-158 Reforma, Governu Konsidera Hanesan Tranzisaun Jerasionál

Hafoin sorumutu, Francisco Guterres esklarese katak, Primeiru Ministru (PM), José Alexandre Kay Rala Xanana Gusmão hateten ona iha ninia diskursu serimónia tomada-de-posse bá membru IX Governu konstitusionál nian, iha Palásiu Prezidensiál, Ai-tarak laran, Díli, Sábadu (01/07/2023) katak, iha ninia lideransa ne’e sei haree fali prossesu ilegál bá apozentasaun forsada, ne’ebé afeta bá ajentes PNTL barak tebes.

“Primeiru Ministru iha altura ne’ebá ko’alia kona-bá kestaun reforma sira la loos no la tuir regras,” Ministru Interiór, Francisco Guterres.

Razaun hala’o sorumutu ho membru reformadu sira ne’e atu ko’alia ho sira, atu rona sira nia hanoin, kona-bá prosesu tomak ne’e la’o oinsa, nune’e Governu bele foti desizaun ida, bolu komandu atu foti desizaun ruma iha Konsellu Ministrus.

Francisco Guterres konsidera membru PNTL sira ne’e, Estadu gasta osan barak bá sira hodi forma ona sira sai Polísia to’o oras-ne’e.

Tanba ne’e maka, bainhira sira reforma hotu ona, Governu tenke husik ho dignu bá kraik atu sira kontinua kontribui bá dezenvolvimentu, pás no estabilidade iha rai ida-ne’e.

“Sira kontinua iha ligasoens emosionais ho instituisaun PNTL, kuandu PNTL presiza sira iha tempu ruma ne’ebé difísil, sira mai kontribui no ajuda nafatin. Ida-ne’e mak ita halo,” Francisco Guterres esplika.

Durante sorumutu ne’e, Francisco Guterres ho Komandante Jerál no Segundau Komandante Jerál PNTL rona no sira preokupasaun no lamentasaun barak hosi membru reformadu sira ne’e, no komandu aponta sei ko’alia fila-fali.

“Ami sei tuur hamutuk fila fali, koalia no sei informa bá Primeiru Ministru, sei lori bá Konsellu Ministru, hodi deside kona-bá ida-ne’e,” nia hateten tán.

Ministru ne’e esplika fila-fali katak, estatutu PNTL klaru, mekanizmu no prosesu sira ne’e mak presiza hadi’a.

“Sira na’in-hira ne’e mós la’ós mai atu azíje tama fali ka la’e. Sira mai husu buat ida de’it, reforma ne’e tenke ho dignu. Ami kontribui, servísu bá rai ida-ne’e, bá instituisaun ida-ne’e kleur ona, labele kaer ami so’e sai de’it. Mai, ha’u haruka ami sai hosi odamatan ho didi’ak. Ida-ne’e mak sira ko’alia bá ha’u,” Francisco Guterres haktuir preokupasaun membru reformadu sira nian.

Tanba ne’e, Governante promete katak Governu sei halo tuir ida-ne’e, sei halo tuir oinsá meius ne’ebé mak dignu, reforma ne’ebé dignu, nune’e sira fila bá komunidade, kontribui nafatin bá pás ho estabilidade.

Razaun ida-ne’e maka Governu foun ne’e sei husik membru reformadu sira atu tun bá kraik, lori sira tun bá ajuda mós komunidade, ajuda autoridade lokais, ajuda juventude atu ko’alia bá sira hodi bele mós tranforma sira-nia mentalidade liuliu populasaun bele moris ho hakmatek.

Iha fatin hanesan, membru reformadu, Superintendente Asistente Pascoal Ferreira Guterres hateten, ema hotu hatene ona, saida mak antes ne’e PM Xanana Gusmão ko’alia kona-bá sira hamutuk na’in-158 ne’ebé tama ona reforma. 

Tanba ne’e, situasaun ne’ebé mak agora reformadu sira enfrenta, iha situasaun ida pre-apozentasaun. Ho Bahasa karik dehan “masa persiapan bá iha pensium”. Tanba ida-ne’e, Governu ninia politika hodi haree ka la’e.

Reformadu ne’e dehan, sira-ninia ezijénsia ne’e maka maizumenus sai bá ne’e labele hanesan sira tama hosi odamatan, ema suta sira hosi Janela.

Jornalista: Rogério Pereira Cárceres