Hatutan.com, (26 Jullu 2023), Díli—Prezidente Komité 12 Novembru, Gregório Saldanha preokupa ho konstrusaun monumentu memoriál Masacre Santa Cruz ne’ebé ninia prossesu la’o tarde tebes no husu ba governu atu hola medida adekuadu tuir Lei, nune’e empreza konstrutór bele finaliza projetu ne’e tuir kontratu ne’ebé iha.

Konstrusaun monumentu memoriál Masacre Santa Cruz. Foto/Elio dos Santos da Costa.

Projetu konstrusaun Memoriál Masacre Santa Cruz ne’e ezekuta hosi empreza nasionál Bobolait, Lda, ne’ebé ezekuta ho valor projetu millaun $1,385.

Lee Mós: Deskonfia, Korrupsaun iha Projetu Konstrusaun Memórial Masakre Santa Krús

“Komité 12 Novembru nia ezijénsia maka obra konstrusaun monumentu Memoriál Masacre Santa Cruz ne’e tenke hotu, garante kualidade no tenke lalais tuir tempu ne’ebé determina tanba konstrusaun ne’e kleur liu ona,” Gregório Saldanha hateten iha Semitériu Públiku Santa Cruz, Kuarta (26/07/2023).

Gregório Saldanha esplika, na’in ba projetu konstrusaun monumentu Memórial Masacre Santa Cruz ne’e maka Governu liu hosi Ministériu Asuntu Kombatente Libertasaun Nasionál (MAKLN).

Desde inisiu konstrusaun ne’e, Komité 12 Novembru sempre eziji atu obra ne’e finaliza tuir tempu ne’ebé determina ona, maibé to’o agora seidauk hotu no hein atu governu foun bele impoin ho nia autoridade nune’e Novembru tinan ne’e bele inaugura.

Prezidente Komité 12 Novembru, Gregório Saldanha.

“Ha’u la aponta irregularidade ruma maibé ha’u haree ho matan obra ne’e atrazu demais. Ami eziji, se tarde demais governu tenke fó sansaun ba empreza konstrutór tuir Lei no governu iha Lei no regulamentu sira tuir autoridade ne’ebé governu iha,” nia husu.

Antes ne’e, Ministru Asuntu Kombatente Libertasaun Nasionál (MAKLN), Gil da Costa Monteiro ‘Oan Soru’ hateten Prosesu konstrusaun monumentu Memoriál Masacre Santa Cruz la’o iha fundu infraestrutura no la la’o iha Ministériu Veteranu tanba MAKLN apenas sai na’in de’it, maibé prosesu hotu-hotu ne’e la’o tuir Lei no iha fundu infraestrutura.

“MAKLN ne’e apenas sai na’in de’it, maibé nia definisaun no implementasaun ne’e sai iha fundu infraestrutura. Nia orsamentu ne’e la fó dalan ba Ministériu atu assina direitamente,” Gil da Costa Monteiro Oan Soru subliña.

MAKLN bele hatene prosesu hotu-hotu,  maibé MAKLN labele halo desizaun mesak, tanba tenke liu hosi fundu infraestrutura, atividade hotu-hotu no orsamentu ne’ebé ho montante boot la liu hosi Ministériu.

MAKLN sei halo koordenadenasaun ho CAFI atu tau atensaun ba projetu konstrusaun Memoriál Masacre Santa Cruz atu empreza konstrutór bele finaliza obra ne’e tuir duni tempu ne’ebé iha.

Relasiona ho prosesu konstrusaun Memoriál Masacre Santa Cruz ne’ebé la’o tarde no iha indikasaun ba risku korrupsaun, iha Tersa (13/06/2023), Comissão Anti Corrupção (CAC) liu hosi ekipa Espesialista Anti Korrupsaun nia enjeñeiru na’in-rua bá hala’o inspesaun terrenu bá projetu konstrusaun, iha Suku Santa Cruz Díli.

Iha loron Tersa (13/06/2023), Hatutan.com tenta halo konfirmasaun direta ho na’in bá empreza konstrutór Bobolait, Lda maibé rejeita atu fó komentáriu.

Lee Mós: MAKLN Sei Koordena ho CAFI Tau Matan Bá Konstrusaun Memoriál Masakre Santa Krúz

Jornalista: Vito Salvadór