Hatutan.com, (08 Agostu 2023), VIQUEQUE—Komandu FALINTIL Forsa Defeza Timor-Leste (F-FDTL), liuhosi Xefe Estadu Maiór, Tenente Jenerál Domingos Raúl “Falur Rate Laek” husu bá militár foinsa’e hotu iha instituisaun ne’e, atu kontinua banati tuir ezemplu di’ak sira hosi Asuwain Forsas Armadas Libertasaun Nasionál Timor-Leste (FALINTIL) nian no tenke hala’o misaun sira ho responsabilidade, buka hamriik hamutuk ho povu iha kualkér situasaun.

Marsa FALINTIL nian, iha fatin istóriku Krarás iha Suku Bibileo, Postu Administrativu Viqueque Villa, Munisipiu Vikeke, Tersa (08/09/2023), hodi komemora aniversáriu ezisténsia FALINTIL nian bá dala-48 (20 Agostu 1975 to’o 2023). Foto: Rogério Pereira Cárceres/Hatutan.com

Tenente Jenerál Falur Rate Laek husu durante diskursu abertura serimónia Marsa FALINTIL nian, iha fatin istóriku Krarás iha Suku Bibileo, Postu Administrativu Viqueque Villa, Munisipiu Vikeke, Tersa (08/09/2023), hodi komemora aniversáriu ezisténsia FALINTIL nian bá dala-48 (20 Agostu 1975 to’o 2023).

Lee Mós: Ezisténsia FALINTIL bá Dala-48, Hakat Tuir Ain-fatin no Hametin Unidade Nasionál

“Husu militár foun sira atu halo tuir mós FALINTIL nia hakarak, tenke nafatin iha relasaun ne’ebé besik ba povu, hatudu empatia no serbisu hamutuk ho sira, hamriik hamutuk ho sira liuhosi tempu di’ak no aat,” Falur Rate Laek, hateten.

Husu mós atu kontinua serbisu ho fuan hodi realiza sira-nia aspirasaun ba moris ne’ebé di’ak liu no lori glória boot liután ba povu no F-FDTL.

Falur sente onradu tebes hodi partisipa iha loron importante ida-ne’e hodi hanoin hikas tinan Haat Nulu (40) Levantamentu Armada Populár iha Krarás.

Tinan 40 ona, aktu eróiku ida-ne’e no nia konsekuénsia sira kontinua husik hela memória hodi Timoroan hotu refleta no komemora atu labele haluha, espíritu determinante sira ne’ebé kontribui signifikativamente bá Timor-Leste nia ukun-rasik aan.

Funu-na’in FALINTIL ne’e bolu Timoroan hotu atu aproveita momentu ida-ne’e hodi hafolin memória hosi kompatriota no populasaun hotu-hotu ne’ebé sofre konsekuénsia hosi loron istóriku ida-ne’e no revolusionáriu veteranu sira seluk ne’ebé kontribui ona bá FALINTIL nia ezisténsia.

Marsa FALINTIL nian, iha fatin istóriku Krarás iha Suku Bibileo, Postu Administrativu Viqueque Villa, Munisipiu Vikeke, Tersa (08/09/2023), hodi komemora aniversáriu ezisténsia FALINTIL nian bá dala-48 (20 Agostu 1975 to’o 2023). Foto: Rogério Pereira Cárceres/Hatutan.com

Fó hanoin katak, Timoroan hotu tenke apriende hosi istória atu bele komprende tansa mak FALINTIL sira luta hasoru injustisa. Liuhosi espellu istória nian, sira bele hetan fatin ne’ebé Timoroan hamriik daudaun no hetan futuru.

Tenente Jenerál Falur kponsidera povu mak erói loloos, tanba sira mak kria istória. Nune’e Timoroan hotu tenke iha unidade no lidera ninia povu hodi serbisu maka’as atu hetan moris ne’ebé di’ak liu. Nasaun ne’e mak ninia povu, povu mak nasaun.

Nu’udar Timoroan sira luta ona atu estabelese no konsolida ninia lideransa iha nasaun ne’e, FALINTIL luta ona atu manán no mantein povu nia apoiu.

FALINTIL-F-DTL iha povu nia huun, nia raan moris, no nia forsa. FALINTIL-FDTL sempre reprezenta interese fundamentál hosi povu Timor-Leste tomak.

Koordenadór bá Marsa FALINTIL nian iha tinan ida-ne’e, Tenente Coronel Henrique Piedade da Costa “Fitun” esplika, atividade la’o ain ida-ne’e, halo atu reforsa mós bá eventu selebrasaun loron FALINTIL nian iha 20 Agostu tinan ne’e nian. Preparasaun bá atividade la’o ain ne’e hahú kedan iha loron 05 Agostu.

“Ami identifika fatin ida-ne’e, halo parte área Krarás nian tanba ida ne’e maske ami labele halo iha ne’ebá. Maibé, ami identifika fatin ida-ne’e hodi hahú ita-nian serimónia. Eventu ida ne’e, ami deside hodi tau bá data 08 Agostu, tanba loron bá levantamentu ka loron istóriku liubá iha Krarás ninian,” Tenente Coronel Henrique Piedade da Costa hateten.

Membru F-FDTL ne’ebé partisipa iha eventu marsa FALINTIL ne’e hamutuk na’in 58, pelutaun ida hosi Komponente Terrestre (CT), seksaun ida hosi Komponente Navál, seksaun ida hosi Unidade FALINTIL (UF), Ministériu Saúde (MS) liuhosi Ospitál Horez Baucau nian, iha médiku na’in-tolu, Assesór CT nian ida, militár Portugéz nian ida, Kapitaun Pedro, inklui Médiku hosi CT nian.

Rute marsa FALINTIL ne’e hahú hosi Bibileo, bá toba iha 03 de Marsu, kontinua marsa bá toba iha Maubai, no deskansa ikus liu iha Tula-Oli. Iha ne’ebá, ita halo enseramentu iha Cairui, Laleia Manatuto nian.

Komunidade Haksolok

Iha fatin hanesan, Xefe Suku Uaimori, Francelino António Gomes hato’o sentimentu ksolok, tanba Komandu F-FDTL hetan apoiu mós hosi Ministériu Defeza (MD), bele organiza eventu Marsa FALINTIL nian iha sira-ninia suku laran, no ida ne’e bele fó hanoin nafatin bá sira nomós Timoroan hotu, kona-bá akontesimentu iha área Kráras, Viqueque.

Xefe Suku Bibileo, Vasco Soares mós agradese bá komandu F-FDTL, tánba bele loke serimónia Marsa FALINTIL nian iha sira-ninia suku.

Tuir ninia koñesimentu, área ne’ebá uluk hanesan fatin bá konsentrasaun funu Asuwa’in FALINTIL nian ho Militár sira Tentara Nasional Indonézia (TNI).

Jornalista: Rogério Pereira Cárceres