Hatutan.com, (09 Agostu 2023), Díli—IX Governu Konstitusionál liu hosi Reniaun Konsellu Ministru (KM) diminui ona taxa Lei impostu seletivu hosi 5% tun ka aplika fila-fali bá taxa anteriór ho 2,5%.

Desizaun ne’e Konsellu Ministru propoin ona iha Progama IX Governu Konstitusionál, hakarak hamenus impaktu inflasaun no aumentu kustu vida ba sidadaun sira, hodi aumenta sira-nia podér kompra nian.

Lee Mós: Xefe Estadu Promulga OJE 2023 Billiaun $2,16

“Ba ida-ne’e, halo ajustamentu ida bá taxa impostu seletivu konsumu no direitu aduaneiru nian bá importasaun ne’ebé bele aplika iha tinan 2023, ne’ebé aumenta iha inísiu tinan ne’e, liuhosi Lei númeru 15/2022, loron 21 fulan-dezembru, Orsamentu Jerál Estadu (OJE) ba tinan 2023 nian,” Hatutan.com sita komunikadu, Kuarta (09/08/2023).

Tanba ne’e, halakon taxa impostu seletivu konsumu kona-bá masin-midar, nune’e mós aumentu bá direitu aduaneiru importasaun nian no aplika fila-fali taxa anteriór ho 2,5%.

Governu mós aproveita hodi halo alterasaun ba diploma boot rua ne’ebé iha ligasaun besik ho Orsamentu Jerál Estadu, iha Lei n. 2/2022, loron 10 fulan-fevereiru, Enkuadramentu ba Orsamentu Jerál Estadu no jestaun finanseira públika, no iha Lei n. 8/2008, loron 30 fulan juñu, Lei Tributária, ne’ebé altera husi Lei n. 5/2019, loron 27 fulan-agostu, ho objetivu atu asegura rigór no transparénsia ida ne’ebé boot iha ezekusaun Orsamentu Jerál Estadu no kontas públikas nian.

Alterasaun ida-ne’e inklui mudansa iha alterasaun orsamentál, hodi garante estabilidade boot ba Orsamentu Jerál Estadu ne’ebé aprova ona, eliminasaun ba lei Planu Opsaun Prinsipál, ne’ebé kria hodi troka nia fatin maka Planu Anuál Investimentu Estratéjiku, dokumentu tékniku ida ne’ebé aprezenta planeamentu anuál ho impaktu ba orsamentu ne’ebé aprezenta hamutuk ho proposta lei Orsamentu Jerál Estadu, no ajusta bá rejime ezekusaun orsamentál iha períodu entre nomeasaun Governu no apresiasaun programa Governu nian, nune’e mós iha períodu entre rejeisaun programa Governu no nomeasaun Governu foun.

Jornalista: Vito Salvadór