Hatutan.com, (11 Setembru 2023), Díli—Polisia Nasionál Timor-Leste (PNTL), Komandu Munisipiu Ermera, liuhosi Eskuadra Letefoho, iha Domingu (10/09) tuku 17:30 otl kaptura ona suspeitu ida ho inisiál E tanba deskonfia ta’a vítima mane na’in-tolu mak hanesan, Alexandre, Moises no Benjamin.

Portavós Komandu jerál PNTL, Superintendente Polisia António da Luz. Foto: PNTL.

Kazu insidente omesídiu ne’e akontese iha kinta (07/09/2023) tuku 11:30 iha Suku Katrai-Leten, Postu Administrativu Letefoho, Munisipiu Ermera.

Lee Mós: Tentativa Omesídiu Iha Cová Akontese Bainhira Vítima Fila Hosi Atambua

Kazu ne’e rezulta vítima Alexandre no Moises ho kondisaun fízika kanek gráve no vítima Benjamin, mate kedan iha lokál insidente.

Liuhosi konferénsia imprénsa, Portavós Komandu jerál PNTL, Superintendente Polisia António da Luz, hateten, hafoin akontesimentu kazu ne’e, komandante Eskuadra Letefoho simu kedan kontaktu ida hosi Xefe Suku Katrai-Leten hodi informa kona-bá kazu ne’e no husu polísia ninia apoiu atu halo atuasaun iha terrenu.

Bainhira membru Polisia sira to’o iha lokál insidente hamutuk ho médiku sira, família sira, inklui autoridade lokál, evakua kedan vítima sira bá Postu Saúde Letefoho, hodi hetan asisténsia médika.

Vítima Benjamin ne’ebé lakon vida ka mate submete kedan bá prossesu autópsia, hafoin ida-ne’e, entrega fila bá família sira hodi hala’o funebre, tuir lisan ne’ebá nian.

Maski autór E ne’ebé ta’a vítima na’in-tolu halai sees hosi lokál insidente, maibé, membru PNTL sira iha Eskuadra Letefoho nian kontinua halo esforsu hodi buka tuir to’o kaptura iha domingu (10/09/2023), tuku 17:30, oras lorokaik Otl, iha mota ida naran Webere, Letefoho.

“Liuhosi esforsu membru sira iha komandu munisipiu Ermera, liu-liu Ekuadra Letefoho, horseik, (10/09/2023) kaptura ona suspeitu ne’e iha área mota Webere, parte Letefoho ninian, ne’ebé maka ita-nia membru sira halo patrulla no buka tuir to’o sira hetan,” António da Luz informa iha Komandu Jerál Caicoli-Dili, Segunda (11/09/2023).

Tuir informasaun jerál ne’ebé Portavós Komandu jerál PNTL nian simu katak, kazu ne’e mosu bainhira suspeitu E ho vítima sira mós partisipa hotu hela iha seremónia kulturál fase-matan bebé nian, derepente de’it, suspeitu E mosu  bá kaer hela kro’at ida hanesan katana, hodi ta’a vítima na’in-tolu.

“Derepente de’it, suspeitu mai lori katana ta’a kedan vítima na’in-tolu, ida mate fatin, no rua kanek. Tán ne’e, motivu hosi kazu ne’e só iha prosesu investigasaun mak sei hatene, tanba agora vítima na’in-rua ne’ebé kanek, hetan ona tratamentu saúde,” nia hateten.

Hatán kona-bá iha informasaun balun katak suspeitu E ne’e ho kondisaun moras mentál, Komandante António da Luz dehan, ida ne’e liuhosi prosesu teste médiku de’it mak bele hatene, indika katak, ema ne’e moras mentál ka, lae. Maibé, hosi parte Polisia nian maka, haree bá aktu ne’ebé maka suspeitu komete.

Oras ne’e suspeitu E ne’ebé deskonfia nu’udár autór bá iha kazu tentativa omesídiu ne’e detein hela iha sela Eskuadra Polisia Letefoho nian no ohin lokraik sei transporta mai iha Komandu Munisipiu Ermera hodi bele prosesa tuir justisa formál ne’ebé mak iha nune’e autór ne’e bele responsábiliza bá ninia hahalok kríme ne’ebé komete.

“Parte investigasaun rekolla ona informasaun hosi vítima sira no kompleta ona dadus sira ne’e hein submete bá Ministériu Publiku atu prosesu kontinua. Ita detein nia oras 72, depois mak haruka bá Tribunál,” Superintendente Polisia António da Luz esplika.

Jornalista: Rogério Pereira Cárceres