Hatutan.com, (16 Setembru 2023), Díli—Tribunál Judisiál Primeira Instánsia Díli (TJPID) liuhosi desizaun ikus, aplika medida koasaun prizaun preventiva bá arguidu ho inisiál AMV hanesan autór bá kazu lori traballadór timoroan sira bá Korea Súl, konsege lohi hodi fó no haruka osan $2.964 liuhosi konta bankária.

Arguidu AMV hanesan autór bá kazu lori traballadór timoroan sira bá Korea Súl, konsege lohi hodi fó no haruka osan $2.964 liuhosi konta bankária, tuir julgamentu iha Tribunál Judisiál Primeira Instánsia Díli (TJPID), Sábadu (16/09/2023). Foto : Elio dos Santos da Costa.

“Depois de primeiru interrogatóriu horiseik, rezultadu foin hasai aplika kedan medida koasaun prizaun preventiva bá arguidu, tanba nia temi ema balun nia naran ne’ebé mak Ministériu Públiku ho polísia buka tuir. Entaun, nia tenke iha prizaun atu proteje nia an iha ne’ebá hodi investigasaun hotu lai mak ita bele haree no husu kona-bá alterasaun medida koasaun bá tempu tuir mai,” Defensór Marçal Mascarenhas, hateten hafoin rona desizaun Juiza nian iha Tribunál Díli, Sábadu (16/09/2023).

Lee Mós: Suspeitu AMV Alegadu Prizaun Preventiva Tanba Lohi Traballadór iha Korea Súl Fó $2.000-resin

Defensór Marçal Mascarenhas fó razaun katak, desizaun prizaun preventiva ne’e atu evita arguidu halo komunikasaun ka ligasaun ho suspeitu sira ne’ebé oras-ne’e autoridade sei buka-tuir. Bainhira nia lívre, bele komunika ho autór sira seluk halai sees hosi responsábilidade kriminál.

“Kuandu sei iha provas seluk, entaun nia ligasaun iha liur, nia bele kontaktu ema sira ne’e bele sees aan,” Defensór Marçal Mascarenhas, esplika.

Ministériu Públiku hanesan investigadór, tenke buka-tuir ema sira ne’e to’o hetan, submete hotu sira bá investigasaun kriminál. Bainhira arguidu AMV mak lívre iha liur, nia bele perturba.

Hatán kona-bá pozisaun Defeza nian bá desizaun ne’e, Defensór Marçal Mascarenhas dehan, importante liu-liu maka arguidu ninia seguransa. Sé nia iha liur, ema sira ne’ebé mak sai vítima, sai ofendidu bá nia hahalok sira, bele halakon nia vida.

“Di’ak liu, tau nia iha laran atu nune’e prosesu ne’e la’o hodi hein desizaun Tribunál. Tanba ita agora sei respeitu bá iha Prezunsaun Inosénsia. Tanba, nia rasik mós dehan katak nia mós sai vítima hotu bá kazu ida-ne’e, tanba ema seluk mós hasai fali ninia foto hodi ameasa nia,” nia tenik.

Audiénsia primeiru interrogatóriu ne’e prezide hosi Juiz Singulár Afonso Carmona, Ministériu Públiku (MP) reprezenta hosi Prokuradór António Taváres no Arguidu hetan asisténsia legál hosi Defensór Marçal Mascarenhas.

Iha Kuarta (13/09/2023) tuku 15:00 otl, Polisia Nasionál Timor-Leste (PNTL) liuhosi Departamentu Investigasaun Kriminál (DIK) kaptura suspeitu AMV ho Flagrante delito, tanba nia involve iha kazu tolu, mak hanesan, Burla Agravadu, Furtu Agravadu, ho ida tán bolu Grooming ka Cyber Crime.

Jornalista: Rogério Pereira Cárceres