Hatutan.com, (18 Setembru 2023), Díli—Parlamentu Nasionál (PN) liuhosi Komisaun C ne’ebé trata assuntu Finansas Públikas, halo hela elaborasaun bá rezultadu fiskalizasaun iha Rejiaun Administrativa Espesiál Oecusse Ambeno (RAEOA), inklui polémika “fa’an” Uma Estadu iha área Fulolo, aldeia Sanane, Suku Costa, Sub-Rejiaun Pante Makasar.

Edifísiu Parlamentu Nasionál. Foto: Média PN.

Membru Komisaun C, Duarte Nunes hateten assuntu ne’e bá Hatutan.com iha kna’ar fatin PN, Segunda (18/09).

Lee Mós: Komisaun C Sei Fiskaliza Rezidénsia Estadu Fulolo Ne’ebé Arsénio Bano “Fa’an” bá Alkatiri

“Hein oras-ida fó-sai iha relatóriu mak haree. Tanba ha’u hanesan membru. Relatóriu mak hanesan formál, ofisiál atu ema hotu-hotu hatene. Ne’ebé, buat di’ak iha, buat ne’ebé la di’ak ami tenke ko’alia. Buat ne’ebé ami haree, ne’e ami tenke ko’alia. Relatóriu seidauk sai, prepara hela iha komsiaun,” Duarte Nunes hateten.

Deputada ne’e adianta de’it katak, iha Sesta (15/09) Komisaun hala’o duni fiskalizasaun bá projetu sira mak oras-ne’e la’o hela iha RAEOA  no konsege haree besik liu tán prosesu dezenvolvimentu hirak mak la’o iha rejiaun ne’e.

Antes ne’e Prezidente Komisaun C, Deputada Cedelizia Faria dos Santos fó-sai ona bá média nasionál balun katak, durante hala’o fiskalizasaun iha RAEOA konsege rona direta preokupasaun hosi komunidade afetadu bá projeitu ZEESM durante tinan sia (9) ona  maibé seidauk hetan indeminizasaun.

Tanba ne’e, parte Komissaun C propoin ona bá Prezidente Autoridade RAEOA, Arsénio Paixão Bano tenki selu.

Jornalista Estajiária: Zita Menezes