Hatutan.com, (18 Setembru 2023), Díli-Bankada Parlamentár hosi partidu Congresso Nacional de Reconstrucção de Timorense (CNRT) hakarak bankada hothotu iha Parlamentu Nasionál (PN) halo konsensu bá prosesu eleisaun Komisáriu foun Comissão Anti Corrupção (CAC) nian.

Lee Mós: Xanana Gusmão Propoin Sérgio Hornai ho Rui Pereira bá Komissáriu CAC

Xefe Bankada CNRT, Duarte Nunes. Foto/Zita Menezes

Xefe Bankada CNRT, Duarte Nunes, Segunda (18/09/2023) iha PN haktuir bá jornalista sira katak  daudaun ne’e bankada sira hosi Governu (CNRT ho PD) buka hela bankada opozisaun sira, liu-liu deputadu Frente Revolusionáriu Timor-Leste Independente (FRETILIN) hodi ko’alia konsensu molok hakat bá eleisaun komisáriu CAC.

Primeiru Ministru (PM), Kay Rala Xanana Gusmão, propoin ona naran rua mak hanesan Sérgio de Jesus Fernandes da Costa Hornai ho Rui Pereira dos Santos, bá Parlamentu Nasionál (PN) atu hili sé mak votu barak liu assume responsabilidade nu’udár Komissáriu foun bá Comissão Anti Corrupção (CAC).

Projetu Proposta Rezolusaun Parlamentu Nasionál ne’e Xanana Gusmão aprezenta iha Sorumutuk Konsellu Ministru nian iha loron 13 fulan-setembru tinan 2023.

“Projetu Propósta Rezolusaun Parlamentu Nasionál ne’ebé aprezenta hosi Primeiru-Ministru, Kay Rala Xanana Gusmão, kona-bá naran rua ne’ebé sei propoin bá Parlamentu Nasionál bá kargu CAC hetan ona aprovasaun,” Hatutan.com sita komunikadu.

“Ami buka hela, mas prezidente bankada seidauk iha, ha’u  dehan ohin ha’u buka ona, maibé  ami na’in rua seidauk hasoru tanba nia laiha ne’ebé iha tempu badak  ami hasoru malu tanba hakarak lakohi boot rua ne’e tenke lian ida,” Deputadu  Duarte Nunes hateten.

Duarte Nunes dehan, maske uluk mosu duni problema iha eleisaun bá Komisáriu CAC, maibé, agora tenke tuir dalan ida-ne’e no karik bankada opozisaun hakarak, eleisaun ne’e bele la’o bá oin.

“Ami hakarak buat ne’e bele la’o ohin ha’u fó hatene ona vise-prezidente bankada  buka arranja fatin no tempu ruma karik ita ko’alia la’ós bá buat seluk, maibé kona-bá asuntu ne’e rasik, ha’u bá ne’e bá ho ema ida, la’ós interese ha’u nian, maibé interese partidu nian no bankada nian ne’ebé ha’u bá ho ida,’’ Duarte Nunes hateten.

Xefe bankada CNRT ne’e informa, lista naran rua bá komisáriu CAC nian ne’ebé Governu haruka ona bá PN, inklui ona mós ho nia Curriculum Vitae (CV) no sira-ninian esperiénsia sira hotu.

Deputada bankada Governu ne’e dehan, figura kandidatu rua; Sergio de Jesus Fernandes da Costa Hornai ho Rui Pereira dos Santos, ne’ebé Governu propoin ona bá PN, hothotu halai ona bá polítiku. Tanba ne’e maka, partidu boot rua CNRT ho FRETILIN tenke konsensu, haree entre figura rua ne’e, sé mak independente hodi bele hamosu ema ida bá komisáriu foun CAC nian.

“Ita hotu hakarak ida ne’e de’it ne’e mak ita tenke ko’alia, la’e ita la la’o. Ita tenke muda lei ne’e fasil hela, maibé ne’e la’ós kestaun muda lei. Bá ami la’ós kestaun muda lei, maibé ita hatudu liman bá malu nafatin, loos  ka lae, ha’u loke sé maioria muda lei. Loos ona ida mai ami tau ona ita hakarak mak ema ne’ebé independente. Tanba ne’e mak tenke konsensu konsensu ne’e importante,” Duarte Nunes hateten.

Jornalista Estajiária: Zita Menezes