Hatutan.com, (28 Setembru 2023), Díli—IX Governu Konstitusionál liu hosi Reuniaun Konsellu Ministru (KM) iha Kuarta (27/09) aprova rezolusaun ida atu Ministériu Obras Públika ho Ministériu Administrasaun Estatál (MAE) bolu administradór sira, Xefe Suku, Xefe Aldeia sira hodi ko’alia atu bele fó atensaun másimu ba komunidade sira labele tesi kanu no hasai bee arbiru hosi kanu sira.

Primeiru Ministru, Xanana Gusmão. Foto/Dok. Hatutan.com.

Primeiru-Ministru (PM) Kay Rala Xanana Gusmão fó atensaun katak, bainhira Xefe Suku no Xefe Aldeia sira la kontrola komunidade tesi kanu arbiru, Governu sei la selu ka sei la simu osan.

Lee Mós: EUA Tau Millaun $420 Apoia Programa Edukasaun, Bee-Moos ho Saneamentu

“Komunidade tesi ka halo kuak kanu bee-moos arbiru de’it. Tanba ne’e, sei kontrolla hotu. Xefe Suku, Xefe aldeia sira la kontrolla didi’ak ida-ne’e la simu osan,” Xanana Gusmão hateten iha Palásiu Prezidensiál Nicolau Lobato Bairru-Pité, Kinta (28/09).

Rezolusaun ne’e Governu prodús tanba halo ona estudu ida hodi avalia kanu balun ne’ebé monta kedan desde tempu Portugés, kanu balun monta iha tempu Indonézia, kanu balun monta iha tempu ukun an, maibé tesi estraga hela de’it.

“Ne’e mak hasai rezolusaun ida atu fó hatene ba Xefe Suku, Xefe Aldeia sira dehan kuidadu ida-ne’e ho komunidade sira. Tanba ita hasai tiha mai komunidade sira labele hariis, kanu estraga hela, tesi tiha, balun uza sanio tenke kontrolla hotu,” Xefe Governu hateten.

Primeiru-Ministru afirma, IX Governu Konstitusionál iha seriedade rezolve problema bee moos no problema mudansa klimátika ne’ebé lori mós impaktu negativu ba povu nia moris.

Jornalista: Vito Salvadór