Hatutan.com, (26 Setembru 2023), Díli- IX Governu Konstitusionál iha komprimisu boot atu hadia jestaun no konstrusaun bá sistema fornesimentu bee-moos hodi garante asesibilidade bá povu, inklui mós ba balada sira hotu.

Lee Mós : EUA Tau Millaun $420 Apoia Programa Edukasaun, Bee-Moos ho Saneamentu

Komunidade Lori jerigen tula iha karrosa ba buka bee-moos iha área Tasi Tolu, Díli. EPA-EFE/ANTÓNIO DASIPARU

Vise-Primeiru Ministru no Ministru Koordenadór bá Asuntu Sosiál, Ministru Dezenvolvimentu Rural e Habitasaun Komunitaria, Mariano Assanami Sabino ne’ebé lidera enkontru inter ministeriál, iha edifísiu Ministériu Obras Públiku,  Díli, Tersa (26/09/2023, hateten Timor-Leste iha tempu naruk enfrenta problema bee-moos no komunidade barak mak seidauk hetan bee-moos ne’ebé sai mós hanesan fatores ida ne’e fó kontribuisaun bá moras oin-oin ne’ebé povu ne’e enfrenta.

Ho situasaun falta bee-moos ne’e, IX Governu Konstitusionál hakarak kria ekipa interministeriál ida ne’ebé halo koordenasaun no lidera husi Ministériu Obras Públiku (MOP), no Bee Timor-Leste (BTL) atu organiza diak-liu tan servisu sira liga ho fornesimentu bee-moos bá komunidade sira.

“Iha enkontru inter ministeriál ida-ne’e, ita halo koordenasaun servisu di’ak para oinsa halo jestaun no konstrusaun hodi fornese bee-moos ne’ebé di’ak no kualidade bá iha inan-aman no komunidade sira,” Vise Primeiru-Ministru Mariano Assanami Sabino afirma.

Mariano Assanami Sabino hateten iha enkontru ne’ebé envolve liña ministeriál sira ne’e atu bele iha dadus konkreta kona-bá asesibilidade bee-moos bá iha komunidade sira oinsa. Husi Edukasaun atu haree eskola sira-nia assesibilidade bá bee-moos to’o ona iha ne’ebé,  husi Minister Saúde, Sentru Saúde,  Postu Saúde no klinika sira bee-moos adekuadu ona ka seidauk, husi Ministériu Administrasaun Estatal (MAE) atu haree oinsa suku sira, aldeia sira asesu ona bá bee-moos ka seidauk no saida mak presiza tau iha kondisaun atu bele responde ba komunidade sira nia nesesidade bá bee-moos.

Ministériu Agrikultura no Peskas (MAP), liu husi Sekretáriu Estadu Fliresta  mós envolve direita atu haree oinsa konserva bee-matan sira no kria drainazen ne’ebé bele garante sustentabilidade bee-moos bá tempu naruk.

Iha mos Institutu Jeolojia hodi bele haree bá kualudade bee-moos ne’ebé oferese bá komunidade sira.

Vise-Primeiru Ministru no Ministru Koordenadór bá Asuntu Sosiál, Ministro Dezenvolvimentu Rural e Habitasaun Komunitaria, Mariano Assanami Sabino, lidera enkontru interministeriál atu buka solusaun bá problema bee-moos. Foto/Elio dos Santos da Costa

Ministru Obras Públika (MOP), Samuel Marçal hateten,  nia sei forma nafatin ekipa ida para hodi haree oinsa bee ne’e bele reorganiza ho didi’ak para hodi bele to’o bá ema hotu-hotu.

“Ita la’ós la iha bee, lae, ita iha bee barak, maibé bee ne’e la organiza ho didi’ak no bee barak maka soe de’it, tamba ne’e mak ita presija forma ekipa ida integradu para bele haree hotu servisu sira-ne’e,” Ministru Samuel Marçal.

Problema bee-moos ne’ebé iha la’ós MOP nian de’it, maibé interligadu ho ministériu relevante sira seluk, hanesan Ministériu Administrasaun Estatal, problema rai ho mós Ministériu Justisa, seguransa ho Ministériu Interiór no mos ministeriu relevante sira seluk ne’ebé presija dunik atu iha koordenasaun servisu hodi rezolve problema bee-moos ne’e rasik.

Iha servisu inter ministeriál ne’ebé iha sei la aloka tan fundus ruma tamba fundus ne’ebé iha tau ona iha kada ministériu no presija deit koordenasaun servisu ida integradu para nune’e servisu sira bele la’o ho di’ak no bele iha solusaun bá povu nia moris.

“Ha’u hanoin fundus ne’e tau ona iha kada ministériu, no presija deit servisu ekipa, no fundus bá bee-moos ne’e Governu tau barak ona iha Bee Timor-Leste (BTL), iha Programa Nasionál Dezenvolvimentu Suku (PNDS), no mós liu husi programa sira seluk ne’ebé iha relevánsia ho bee-moos,” Samuel Marcál tenik.

Jornalista: Vito Salvadór