Hatutan.com, (29 Setembru 2023), Díli–Komisaun Anti Korrupsaun (CAC, sigla portugés)  submete tiha prosesu kriminál  hotu kona-bá kazu Ró Ambulánsia Ministériu Saúde (MS) nian bá Ministériu Públiku (MP) iha loron 03 fulan-Dezembru tinan 2015, maibé to’o agora laiha informasaun.

Lee Mós: Dezde 2021, CAC Submete Ona Kazu Ró Peska ESTV Atauro bá MP

Ró Saúde ne’ebé atraka hela iha tasi-laran área Lecidere, Díli, maibé avaria dezde 2012. Foto/Elio dos Santos da Costa

Iha tinan 2012, Ministériu Saúde liuhosi  Diresaun Nasionál Servisu Hospitallares no Enkanamentu (DNSHE)  sosa ró ambulánsia ho kustu $414,876.64, maibé la konsege utiliza bá nesesidade transporta pasiente sira hosi Atauro no Oé-Cosse mai Díli tanba ró ne’e avaria kedas mementu ne’ebá to’o ohin loron.

Bá Hatutan.com iha nia servisu fatin, Edifísiu CAC, foin lalais ne’e, Diretór Investigasaun CAC, José Verdial, informa kazu Ró Ambulánsia MS nian ne’e tama hotu ona iha prosesu investigasaun kriminál no CAC termina ona investigasaun hodi submete tiha ona Ministériu Públiku iha loron 03 fulan-Dezembru 2015.

“Kona-bá ró ambulánsia ninian ne’e mós, ha’u hanoin katak, ida ne’e, antes kedas ona, investigasaun iha 2015, no kazu saúde ne’e nia  relatóriu haruka iha loron 30 fulan-Dezembru 2015. Mais, ha’u seidauk fiksa ninia tinan investigasaun ne’e. Ha’u nia hatene  investigasaun ne’e ita termina tiha ona,” José Verdial hateten.

Nia esplika CAC nia kompeténsia mak halo de’it investigasaun, no remesa ninia rezultadu bá iha Ministériu Públiku. Agora, prosesu ne’e to’o iha Tribunál, ka la to’o iha Tribunál, ne’e kompeténsia Ministériu Públiku nian.

Ró Saúde ne’ebé atraka hela iha tasi-laran área Lecidere, Díli, maibé avaria dezde 2012. Foto/Elio dos Santos da Costa

Hanesan informa ona katak  iha loron 16 fulan-Outubru 2019, Tribunál Distritál Dili (TDD) halo ona audiénsia Julgamentu bá kazu ró ambulánsia  ne’ebé lori prezuizu bá Estadu $414,876.64.

Iha audiénsia julgamentu tempu ne’ebá Ministériu Públiku (MP) notifika arguidu na’in-ualu (8) ho inisiál hanesan AMPM, arguidu LB, arguida EJA, AC, JFOC, JCS, JCM ho DG. Arguidu  sira hirak-ne’e mesak dirijente importante iha foti desizaun administrativa, fnansa no aprovizionamentu iha Ministériu Saúde.

Bá arguidu sira, MP akuza ho krime partisipasaun ekonomia no negósiu, borla agravadu no falsifikasaun dokumentu ne’ebé previstu iha Artigu 299, 266, 267 husi kódigu penál Timor-Leste.

Empreza ne’ebé hetan  adjudikasaun bá fornesimentu ró ambulánsia PT. Samudra Indoraya Perkasa, ho nia kustu kontratu $423,343,51 no ró ne’ rasik nia medida 11,97 metru.

Jornalista: Rogério Pereira Cárceres