Hatutan.com (29 Setembru 2023), Díli—Ministra Edukasaun (ME), Dulce de Jesus Soares entrega kompeténsia tomak bá Sekretáriu Estadu Ensinu Sekundáriu no Eskola Téknika Vokasionál (SEESETV), Domingos Lemos Lopes, atu akompaña prosesu tomak hosi kazu ró ida ne’ebé sosa hosi Ministériu Edukasaun Juventude no Desportu (MEJD) iha tinan 2016 ho folin $142.000 bá Eskola Tékniku Vokasionál (ESTV) Peska Ataúro, maibé ró ne’e estudante sira utiliza dala-rua de’it hodi halo pratika to’o agora aat no sai ferrujen de’it iha tasi-laran.

Ró ne’ebé MEJD sosa bá ESTV Peska Atauro iha 2016, maibé aat tiha iha 2017 too agora. Foto/Elio dos Santos da Costa.

Besik tinan lima ona (2017 to’o 2023) roo ne’e, para to’o “ferújen” de’it iha tasi-laran. Situasaun ne’e mós, prejudika duni bá estudante ESTV  Peska Atauro sira-nia atividade prátika, ne’ebé mak la la’o to’o ohin loron.

Lee Mós: MEJD Sosa Ró Folin $142,000 bá ESTV Peska Atauro La Utíl To’o Ferrujen

Nune’e bainhira Hatutan.com konfirma ho Ministra Edukasaun (ME), Dulce de Jesus Soares lakohi fó komentáriu kona-bá kazu ne’e tanba nia rasik entrega ona kompeténsia bá Sekretáriu Estadu Domingos Lemos Lopes.

“Sekretáriu Estadu Ensinu Sekundáriu no Eskola Téknika Vokasionál mak iha kompeténsia kona-bá ró hirak ne’e tanba durante ne’e nia rasik mak bá vizita ona ró sira ne’e. Entaun nia mak hatene kle’an bá asuntu ne’e,” Dulce de Jesus hateten bá Hatutan.com iha City8 Manleuana Díli, Sesta (29/09).

Ministra dehan, Sekretáriu Estadu mak bá ko’alia ona ho tékniku sira kona-bá oinsa ró ninia kondisaun no oinsá atu halo manutensaun.

“Ha’u prefere ita boot ba husu de’it Sekretáriu Estadu. Ami fahe tiha ona asuntu ne’e tanba ro ne’e iha liua relasaun ho servisu Sekretáriu Estadu nian,” Ministra Haruka Jornalista Hatutan.com atu konfirma de’it ho Sekretáriu Estadu.

Ró ne’e halo akizasaun iha 2016, halo operasaun iha 2017 tula estudante sira dala rua ka dala tolu de’it ró ne’e aat ona.

Tuir informasaun ne’ebé Hatutan.com asesu katak, ró ne’e hola iha mandatu Ministru Edukasaun  (ME) António da Conceição “Kalohan”.

Iha momentu ne’ebá, Ministra Edukasaun Dulce de Jesus Soares assume kargu hanesan Ministra Interina iha fulan rua nia laran de’it no entrega fila-fali bá Ministru António da Conceição mak prosesa ró ne’e hodi hola.

Antes ne’e, Sekretáriu Estadu bá Ensinu Sekundáriu no Eskola Téknika Vokasionál (SEESETV), Domingos Lemos Lopes vizita ona ró ne’e no haree katak, ró ne’e ninia kondisaun besik aat hotu ona, avaria no ku’ak.

Bainhira ró ne’e avaria iha 2017, tuir mai, to’o ona iha 2022 maka Diresaun Nasionál Ensinu Sekundáriu Tékniku Vokasionál, foin halo pedidu ida, haruka bá eis Ministru Edukasaun, Armindo Maia husu atu halo manutensaun bá ró ne’e. Maibé, informasaun ne’ebé mak iha, katak, ró ne’e, agora en-kauza hela. Tanba ne’e mak, labele halo manutensaun to’o agora, no Ministru Armindo Maia altura ne’ebá la aprova pedidu de manutensaun hosi ensinu tékniku vokasionál nian.

Kona-bá informasaun katak, daudaun ne’e ro ne’e tama ona iha prosesu investigasaun kriminál ninian, Domingos Lemos  konfirma, informasaun ne’e loos duni, maibé nia rasik mós ladun hatene, tanba foin simu kna’ar sekretáriu estadu foun.

Hafoin halo vizita bá ró ne’e, Sekretáriu Estadu ne’e mós entrega kedan ona situasaun ne’e bá Ministra Edukasaun, Dulce de Jesus, sé possível labele halo ona manutensaun, di’ak liu, entrega bá Diresaun Nasionál Jestaun Patrimóniu Estadu nian bele hola kompeténsia tuir lei haruka.

Maski nune’e Governante ne’e afirma, IX Governu Konstitusionál liuhosi Sekretáriu Esatdu ne’ebé nia lidera iha polítika ne’ebé klara, katak sei prevee osan iha OJE 2024, oinsá mak bele sosa fali ró foun seluk ne’ebé di’ak liu.

Observasaun  Hatutan.com nian iha lokál ró refere paradu de’it iha tasi-laran. Bainhira konfirma ho funsionáriu sira Alfándega nian, Servisu Kuarentena, ho pesoál  PNTL hosi Unidade Patrullamentu Marítima  (UPM)  nian kona-bá ró ne’e paradu hori-bainhira, sira ladún iha koñesimentu.

Lee Mós: Dezde 2021, CAC Submete Ona Kazu Ró Peska ESTV Atauro bá MP

Jornalista Estajiáriu: Lazaro Pereira Quefi