Hatutan.com, (17 Outubru 2023), Díli— Governu liu hosi Ministru Prezidénsia Konsellu Ministru (MPKM), Agio Pereira hanesan mós Ministru Koordenadór Assuntu Ekonómiku en ezersísiu,  asina akordu lima ho empreza importadora ai-han sira, hodi implementa intervensaun temporária bá estabilizasaun folin foos iha merkadu.

Ministru Prezidénsia Konsellu Ministru (MPKM), Agio Pereira hanesan mós Ministru Koordenadór Assuntu Ekonómiku en ezersísiu, asina akordu lima ho empreza importadora ai-han sira, hodi implementa intervensaun temporária bá estabilizasaun folin foos iha merkadu, iha Palásiu Governu, Tersa (17/10/2023). Foto: MPKM.

Serimónia assina akordu ne’ebé hala’o iha Palásiu Governu iha Tersa (17/10/2023) ne’e ho empreza lima mak hanesan, Perissos Victoria Lda, Loja Creative Furak Lda, Lisun Importação no Exportação Lda, Jusibel Unipessoal Lda no Alfa Dili Unipessoal Lda.

Lee Mós: Bankada FRETILIN Garante Subsídiu Millaun $4 bá Importadór Foos La Rezolve Problema

“Objetivu hosi akordu ne’e atu assegura presu foos importadu ne’ebé fa’an iha armazen empreza nasionál sira ne’ebé fa’an ho kuantidade bo’ot hodi fixa ho montante másimu $12 bá kada saka ka parsela kilograma 25, atu permite fa’an foos rahun ho folin sentavu 0.50 kada kilograma,” Hatutan.com sita komunikadu.

Atu limite presu másimu ida-ne’e, empreza nasionál sira ne’ebé fa’an foos ho kuantidade boot ka operadór ekonómiku nasionál sira ne’ebé importa foos ho kuantidade boot sei simu subsídiu ho valór $5 kada saku ka parsela 25 Kg, ne’ebé korresponde ho sentavu 20 ba kada kilograma foos nian.

Kritéria ne’ebé emprezáriu sira tenki prienxe hodi hetan subsídiu ne’e maka empreza tenke submete pedidu pagamentu, akompaña ho kopia ne’ebé hetan autentikasaun hosi Autoridade Aduaneira, ne’ebé komprova katak, importasaun produtu tuir espesifikasaun no períudu ne’ebé define ona iha Dekretu-Lei n. 76/2023, loron 29 fulan-setembru, ne’ebé estabelese medida ida-ne’e.

Lee Mós: Tane Konsumidór Propoin Foos 25kg ho Folin $16

Jornalista: Leopoldina de Carvalho