Hatutan.com, (28 Outubru 2023), Oé-Cusse– Abitante ka eleitór analfabetu  sira hosi Suku Usitasae, Postu Administrativu Oe-silo, Rejiaun Administrativu Espesiál Oé-cusse Ambeno (RAEOA) la uza direitu votu ho di’ak tanba bulletin votu  kandidatu xefe aldeia ho kandidatu delegadu suku nian ne’ebé hakerek ho liman (manuál) no la tau foto. Nune’e, eleitór sira-ne’e barak lulun fali de’it bulletin votu kandidatu xefe aldeia nian hodi hatama moos iha urna-laran.

Lee Mós: Mekanizmu Eleisaun Órgaun Suku La Ajuda Idozu ho Defisiénsia Sira Vota ho Di’ak

Eleitór sira iha suku Usitasae, Postu Administrativu Oe-silo, RAEOA, forma hodi partisipa iha eleisaun órgaun suku, 28 fulan-Outubru 2023. Foto/Lazaro Pereira Quefi.

Foufoun iha tuku 09:00 dadeer, abitante sira tinan to’o bá vota ho entuziazmu hakbesik hodi forma iha liña atu bá vota iha eleisaun órgaun suku ne’ebé hala’o iha loron 28 fulan-Outubru 2023, maibé tanba mekanizmu eleisaun la di’ak hodi han tempu naruk. Nune’e too fali tuku 17:00 Otl mós ema sei forma naruk no sena-malu.  

Eleitór balun deside fila de’it bá uma no la konsege vota tanba la aguenta hamlaha no hamrook tanba hamriik liu oras tolu to’o oras lima nia laran hosi tuku 09:00 to’o tuku 14.00 Otl, la han no la hemu. Sira hamriik iha loron laran no rai-manas halo sira la aguenta.   

Eleisaun órgaun suku 2023 ne’e la hetan apresiasaun hosi eleitór sira no  ida-ne’e eleitór sira konsidera eleisaun aat liu iha istória Timor nian.

Eleitór sira iha suku Usitasae, Postu Administrativu Oe-silo, RAEOA, forma hodi partisipa iha eleisaun órgaun suku, 28 fulan-Outubru 2023. Foto/Lazaro Pereira Quefi.

Komunidade analfabetu sira ne’ebé Hatutan.com dada-lia ho sira iha sentru votasaun Eskola Bázika Filial (EBF) Binibu Pune,  hateten, eleisaun prezidensiál ho eleisaun parlamentár sira liubá nia mekanizmu di’ak tebes no la halo ema forma naruk. Maibé eleisaun órgaun suku ne’e kala la importante tanba ne’e Governu liuhosi STAE organiza la másimu hodi hamosu lakuna barak no ema barak la vota.

Iha Suku Usitasae kompostu hosi aldeia tolu hanesan Pune, Sifin no Buki. Aldeia  Pune iha uma-kain hamutuk 396 kompostu hosi abitante nane 721, feto 678 ho total  abitante 1399. Aldeia Sifin iha uma-kain 334, mane 666 no feto 620 ho total  abitante 1286. Aldeia Buqui iha uma-kain 426, mane 850, feto 807 ho total  abitante 1657.  Total uma-kain Suku  Usitasae hamutuk 1156 ho nia abitante hamutuk 4342.

Jornalista: Lazaro Pereira Quefi