Hatutan.com, (29 Outubru 2023), Covalima- Kandidatu Xefe Suku Beiseuk, Postu Administrativu Tilomar, Munisípiu Covalima, António Cardoso ho Domingas da Silva, tenke avansa bá eleisaun segunda ronde iha loron 13 fulan-Novembru 2023, tanba númeru votu la liu bareira 50+1.

Lee Mós: Komunidade Beiseuk Entuziazmu Partisipa Eleisaun Órgaun Suku

Eleitós sira iha Suku Beiseuk, Postu Administrativu Tilomar, Munisípiu Covalima, ejerse sira-nia dereitu iha Eleisaun Órgaun Suku, 28 fulan-Outubru 2023. Foto/Gloria Maia

Iha eleisaun órgaun suku 2023 ne’e, eleitór hamutuk 517 hosi suku Beiseuk la partisipa iha eleisaun ne’e. Nune’e, eleitór sira ne’ebé  ejerse sira-nia direitu demokrátiku iha eleisaun órgaun suku ne’e hamutuk 1.248, ho nia rezultadu nulu 46 no branku 5.

Tuir resenseamentu iha suku Beiseuk total eleitor hamutuk 1.765. nune’e, kandidatu Xefe Suku na’in-hitu mak kompete atu bele lidera Suku  Beiseuk  períodu 2023-2030.

Kandidatu xefe suku sira ne’e mak  hanesan Anderias Ximenes, António Cardoso, Domingas da Silva, Gaspar do Nascimento, Leonito Cardoso ho Mateus dos Reis.

Kandidatu na’in-hitu ne’e ida-idak nia votu  ne’ebé sira hetan hosi eleitór sira  mak hanesan  Anderias Ximenes hetan votu 123,  António Cardoso (489), Domingas da Silva (178), Gaspar do Nascimento (163), Leonito Cardoso (71) ho Mateus dos Reis (173).

Husi rezultadu kontajen ne’e kandidatu xefe suku António Cardoso ho Domingas da Silva nia votu boot liu, maibé la to’o 50+1, tanba votante la to’o rihun ida kada kandidatu, nune’e sei avansa bá eleisaun órgaun suku segundu ronde.

Jornalista: Gloria Maia