Hatutuan.com (29 Abríl 2023), Covalima– Partidu Libertasaun Populár (PLP) iha hanoin atu  dezenvolve iha área turizmu komunitáriu tanba ida-ne’e mak setór produtivu atu diversifika ekonomia iha rai-laran.

Lee Mós : PLP Sei Loke Kréditu Bá Estudante Sira

PLP halo kampaña iha Postu Administrativu Suai, Munisípiu Covalima, Sábadu (29/4/2023). Foto/Elio dos Santos da Costa

Prezidente Partidu Libertasaun Popular (PLP), Taur Matan Ruak, liuhosi kampaña aberta iha Postu Administrativu Suai, Munisípiu Covalima, Sábadu (29/4/2023), hateten, PLP hanoin atu halo mak programa ida bá toos, natar no turizmu  atu diversifika povu Timor-Leste nia ekonomia, tanba tinan bá tinan Timor-Leste dependénsia de’it bá fundu mina-rai.

Atuál Primeiru-Ministru iha Oitavu Governu Konstitusionál Taur Matan Ruak, hateten, PLP hakarak bá fali ukun iha Governu atu tau osan millaun $1000 hodi servisu hamutuk ho kompañia estatál sira hodi jere no servisu hamutuk ho toos no natar na’in sira, kooperativa sira hodi dezenvolve iha agrikultór sira-nia natar no toos ne’ebé abandona ona.

“Sosa tratór ne’e fasil maibé ita seidauk uza tratór ho di’ak tanba tratór at hadi’a de’it sei lori tinan, populasaun hahú fila rai tratór laiha tanba ne’e tenke tau kompañia estatál mak halo, nia sei laiha problema tanba hotu-hotu buka rezultadu,” Taur Matan Ruak afirma.

Taur Matan Ruak husu bá militante ho simpatizante sira hotu tenke  prepara an  didi’ak atu bá tuir eleisaun iha loron 21 fulan-Maiu 2023, hodi hili lider ne’ebé mak tinan lima bá oin atu tau matan bá  Nasaun no povu.

Taur Matan Ruak, nu’udár belun boot hosi família husu ba inan-aman sira atu hili partidu ne’ebé mak defende povu nia hakarak no interese.

“Iha 2002 Timor restaura nia independénsia to’o 2020, tinan 18, ita enfrenta krize haat, hahú iha 2005 to’o 2020, krize sira ne’e perturba  ita lala’o bá oin, atrapalla ita no adia ita nia konkista sira tanba ita laiha tempu atu serbisu hakmatek liu krize polítika halo governu labele funsiona ho di’ak, nune’e ha’u husu dala ida tan atu ba ukun fila fali hodi halo di’ak,” Taur Matan Ruak tenik.

Númeru eleitór iha Munisípiu Covalima mak   Sekretariadu Tékniku Administrasaun Estatál (STAE) rejistu atu partisipa iha eleisaun parlamentár ne’e hamutuk   ema-49,299; mane 25151 (51%) no feto 24148 (49%).

Kampaíña PLP nian ho tipu komísiu ne’e hala’o iha Suku Suai Loro, Postu Administrativu Suai, Munisípiu Covalima, hetan supervizaun hosi Comissão Nasional Eleições (CNE) no seguransa husi Polísia Nasional Timor-Leste(PNTL).

Hafoin komísiu iha Suku Suai Loro, kontinua  ho diálogu iha Munisípiu Ainaro hodi hato’o mós programa sira PLP nian bainhira hetan fiar hosi povu atu Governa iha períodu 2023-2028.

Jornalista : Elio dos Santos da Costa