Hatutan.com, (31 Outubru 2023), Díli—Polisia Nasionál Timor-Leste (PNTL) liuhosi Portavós Komandu Jerál, Superintendente Polísia António da Luz, husu bá joven sira iha territóriu nasionál atu selebra loron matebian nian ka Finadu, tenke ho Pás  hodi bele kontribui bá estabilidade iha rai-laran.

Portavós Komandu Jerál PNTL, Superintendente Polisia António da Luz. Foto: PNTL.

PNTL hahú kedan hosi komandu munisipiu no unidade sira prontu atu assegura sidadaun sira durante selebra loron boot ida ne’e  iha territóriu Timor tomak no sei la fó fatin kualkér sidadaun liu liu joven sira atu hemu alkól ka tua to’o lanu iha semitériu sira.

Lee Mós: Konfrontu iha Dare Durante Finadu, Ida Mate Fatin

“Husu parte hotu-hotu liu-liu joven sira atu kolabora, hodi bele kontribui bá estabilidade. Ita bá ho intensaun domin, atu bele halo orasaun bá ita-nia matebian sira no labele hemu lanu iha semitériu,” António da Luz hateten iha Kuartél Jerál PNTL, Caicoli, Segunda (30/10/2023).

PNTL fó atensaun másimu liu liu bá joven sira atu labele halo problema, tanba membru sira iha terrenu orientadu atu halo atuasaun ho rigorozu, no hakarak atu ema hotu selebra loron importante ne’e ho ambiente hakmatek.

“Labele halo problema durante loron boot ida-ne’e. Tanba ita halo problema maka ita hasoru justisa. Di’ak liu ita koopera, ita hasees aan hosi krime, hasees aan hosi problema,” nia apela.

Bainhira hetan joven ne’ebé mak hemu lanu iha semitériu sei halo kedan detensaun no prosesa tuir Lei ne’ebé iha.

“Sé sira konsumu alkól mak sira halo kríme, pasiénsia, ita tenke halo kapturasaun no prosesa tuir Lei. Kríme ne’e kontra bandu. Katak, Lei kondena, kuandu sira halo kríme, liu-liu baku malu, sá tán to’o halo kanek ema seluk,” nia hateten.

Komandu PNTL, koloka mós membru sira hodi apoia iha munisipiu, liu-liu munisipiu Dili, nune’e bele asegura selebrasaun loron Finadu.

Jornalista: Rogério Pereira Cárceres