Hatutan.com, (03 Novembru 2023 ),  Díli—Abitante sira ne’ebé horik iha sidade kapitál Timor-Leste seidauk iha konsiénsia atu soe fo’er iha fatin lixu nian (lixeiru).

Lee Mós: Tempu Ona Atu Hamoos-Hadi’a Sidade Díli Hosi Lixu no Fahi-Luhan

Labarik sira halimar fo’er ne’ebé ema soe besik iha lixeiru. Foto/Leopoldina de Carvalho

Tuir observasaun Hatutan.com nian iha estrada protokolu sidade Díli nian hatudu katak fatin bá soe lixu  ka lixeiru ne’ebé Governu prepara iha estrada ninin la utiliza ho didi’ak.

Iha ema balun lori fo’er bá soe iha lixeiru, maibé la’ós soe tama bá  iha lixeiru laran ka soe butuk hela de’it iha lixeiru oin.

Iha estrada protokolu hanesan iha área  Hudi-laran, Bairopite, Bebora, Kolmera, Caicoli, Audian, Tasi-tolu no Becora hatudu fo’er barak lekar tama to’o iha estrada laran. Tanba abitante sira bá soe fo’er la’ós  soe iha lixeiru laran, maibé soe fali iha lixeiru oin.

Abitante sira soe lixu iha lixeira oin. Foto/Leopoldina de Carvalho

Informasaun seluk ne’ebé Hatutan.com rekollla hosi fontes oioin katak durante loron tolu ona, dezde iha loron 01 to’o loron 03 fulan-Novembru ne’e,  ekipa servisu foti foer iha sidade Díli ne’ebé Governu kontrata seidauk hala’o servisu hanesan baibain hodi foti ka transporta foer sira ne’e bá fatin leixeiru iha Tibar.

Jornalista : Leopoldina de Carvalho