Hatutan.com, (13 Novembru 2023), Díli-Kandidatu Xefe Suku na’in-rua iha Suku Bidau Santa-Ana, Díli, Alexandrinho M. Da Costa Braz ho Calistro Castro Pereira, kompete iha Eleisaun órgaun Suku segunda volta, Segunda (13/11/2023).  

Lee Mós: Eleisaun Suku Segunda Volta iha Fatuhada La’o Di’ak

Buletin Votu Kandidatu Xefe Suku na’in-rua iha Suku Bidau Santa-Ana, Díli, Alexandrinho M. Da Costa Braz ho Calistro Castro Pereira. Foto/Tome da Silva

Kandidatu Xefe Suku na’in-rua ne’e, ida Alexandrinho M. Da Costa Braz, ho númeru sorteiu 1, hanesan eis Delegadu iha Aldeia Toko-Baru nian, no Calistro Castro Pereira, númeru sorteiu 2, hanesan eis Xefe Aldeia Mota-Klaran.

Kandidatu rua ne’e tenke hakat bá eleisaun suku segunda volta, tanba hetan votu barak liu, hafoin kompete ho na’in kandidatu Xefe Suku na’in-neen seluk, iha eleisaun volta dahuluk, maibé la atinje barreira 50%+1.

Observasaun Hatutan.com iha Sentru Votasaun Sede Aldeia Bidau Manu-Mata, nota katak, iha tuku 07:00 Otl, komunidade ka eleitór sira balu bá forma daudaun ona iha liña laran, hodi hein oras to’o atu vota tuku 09:00 Otl.

Tuir Lei Númeru 09/2023, kona-bá Eleisaun bá Órgaun Suku nian, esplika mós katak, oras votasaun bá eleisaun órgaun suku ne’e, tenke hahú iha tuku 09:00, dadeer Otl, no konklui iha tuku 15:00 Otl.

Prosesu votasaun ne’ebé akontese iha sentru votasaun, Sede Aldeia Bidau Manu-Mata, hahú sedu iha tuku 08:03, Otl. Nune’e, Hatutan.com halo duni konfirmasaun ho Ofisial Eleitorál Sekretariadu Tékniku bá Administrasaun Eleitorál (STAE) nian, liuhosi Prezidente Meza, kona-bá tanba sá mak eleisaun ne’e hahú sedu de’it.

Prezidente meza eleisaun órgaun suku segunda volta iha Sentru Votasaun Aldeia Bidau Manu-Mata, Frederico M.R. Soares, informa katak, eleisaun ne’e hahú sedu, tanba ezijénsia hosi komunidade sira ne’ebé forma ona iha liña laran, sira hato’o katak, iha sentru votasaun seluk, seidauk to’o tuku-sia, mais ema vota ona.

Eleisaun Órgaun Suku Segunda Volta iha Suku Bidau Santa-Ana, 13 Novembru 2023. Foto/Tome da Silva

Iha fatin hanesan, Comissão Nacional de Eleições (CNE) nia Ofisial Monitorizasaun Eleisaun ida ne’ebé observa hela prosesu eleisaun iha sentru votasaun ne’e, informa katak, votasaun ne’e bele hahú sedu no ne’e kabe bá kompeténsia assembleia meza nian.

Iha biban ne’e, reprezentante eleitór hosi Aldeia Manu-Mata, João Barros, hein katak, Xefe Suku foun ne’ebé atu mai tenke iha nia kapasidade lideransa, atu nune’e, bele buka solusaun bá problema oioin ne’ebé komunidade enfrenta no dezenvolve suku Bidau Santa-Ana.

“Ha’u hakarak fó hanoin katak, suku ne’ebé mak atu sai hanesan lideransa bá suku Santa-Ana ida ne’e, hakarak xefe suku ida ne’ebé iha kapasidade, nia bele dezenvolve ita nia suku nia laran ne’e, ida ne’e mak ha’u hakarak. Tanba ida ne’e, importante liu bá ida ne’e, bele rezolve problema oioin iha ita nia suku laran, difikuldade ne’ebé komunidade sira hasoru. Sira bele rezolve lalais problema sira iha komunidade nia laran, ida ne’e ma kami hakarak,” João Barros, hateten bá Hatutan.com.

Totál eleitór Suku Bidau Santa-Ana, iha 5,028, kompostu hosi Aldeia Manu-Mata, 1358  Sagrada Família 1,954, Bidau Mota-Klaran 855, no Toko-Baru 858.

Jornalista: Rogério Pereira Cárceres