Hatutan.com, (13 Novembru 2023), Díli-Eleitór iha sentru votasaun Aldeia 30 Agostu, Suku Comoro, Postu Administrativu Dom Aleixo, Munisípiu Díli, kontínua forma iha liña naruk hodi ezerse sira-nia direitu síviku iha eleisaun órgaun suku segunda volta, Segunda (13/11/2023).  

Lee Mós: Alexandrinho Braz ho Calistro Pereira Kompete Eleisaun Suku Segunda Volta iha Bidau Santa-Ana

Eleitór sira sena-malu no habai-an iha loron laran hodi hein oras ida to’o oras rua nia laran mak bele vota tanba sistema manual ne’ebé implementa iha eleisaun orgaun suku iha segunda volta ne’e.

Eleisaun Órgaun Suku Comoro iha Sentru Votasaun 30 Agostu forma iha liña narok tanba sistema manuál. Foto/Gloria Maia

Observasaun Hatutan.com nian iha Sentru Votasaun Aldeia 30 Agostu, Suku Comoro, nota katak, eleitór sira forma iha liña naruk iha arredores sentru votasaun nian.

Horácio António nu’udár eleitór hato’o nia lamentasaun no husu Ministériu Administrasaun Estatál (MAE) liuhosi Sekretariadu Tékniku Administrasaun Eleitorál (STAE) tenke buka solusaun antes ona ho esperiénsia eleisaun primeira volta nian  atu labele prejudika eleitór sira bá vota iha eleisaun segunda volta ne’e.

“Ita hatene, buat ida hakerek lori liman (manuál) ne’e han tempu, tenke hakerek ema nia naran, númeru Eleitorál, tenke hein satan sira ne’ebé naran naruk, ida ne’e maka halo sidadaun sira baruk no sistema ida ne’e sala, entaun rezulta partisipasaun komunidade sira ne’e menus, tanba ema baruk,” Horácio António haktuir bá Hatutan.com

Nia informa, agora daudauk iha segundu ronde nee ekipa meza lidera hosi ema na’in tolu, maibé ida ne’e mós la di’ak nafatin tanba kontinua hakerek naran ne’e lori tempu.

“MAE ho STAE tenke haree sistema ida ne’e, iha Eleisaun Parlamentár no Prezidente Repúblika sira tau naran  bá sistema, abitante hein lori kartaun eleitór bá konfirma naran no simu bulletin votu bá vota de’it. Ami lamenta teb-tebes ho sistema eleisaun órgaun suku 2023 ne’e,”  nia hateten.

Eleisaun Órgaun Suku Comoro iha Sentru Votasaun 30 Agostu forma iha liña narok tanba sistema manuál. Foto/Gloria Maia

Iha fatin hanesan, Kandidatu Xefe Suku no  Xefe Suku atuál Comoro, Eurico Guterres mós rekoñese katak eleisaun suku ne’e demora tanba STAE mantein de’it ho sistema manuál.

Nia kompromete bainhira re-kandidata ba Xefe suku liu husi segundu ronde ne’e,  atu prepara livru rejistu populasaun aldeia 14 iha suku Komoro nian, no mós fixa família tuir uma-kain sira ne’ebé maka iha.

Totál eleitór Suku Comoro 26.152, maibé iha eleisaun primeiru volta iha  eleitór na’in-9.443 maka partisipa no ezerse sira-nia direitu síviku iha eleisaun órgaun suku, 18 Outubru 2023.

Jornalista : Gloria Maia