Hatutan.com, (01 Dezembru 2023), Díli— Ministru Petróleu no Rekursus Minerais, Francisco da Costa Monteiro, anunsia rezultadu tenderizasaun minerál, organiza hosi Autoridade Nasionál Minerais – Institutu Públiku (ANM.IP) iha ne’ebé empreza haat mak sai vensedór bá tenderizasaun atu halo esplorasaun bá minerais, Kinta (30/11/2023).

Ministru Petróleu no Rekursus Minerais, Francisco da Costa Monteiro, anunsia rezultadu tenderizasaun minerál, organiza hosi Autoridade Nasionál Minerais – Institutu Públiku (ANM.IP) iha ne’ebé empreza haat mak sai vensedór bá tenderizasaun atu halo esplorasaun bá minerais, Kinta (30/11/2023). Foto: MPRM.

Iha prossesu pré kualifikasaun Autoridade Nasionál Minerais rejista empreza konkorrente 14 mai hosi Indonezia, Austrália, India, Singapura, Xina, inklui empreza nasionál haat no selesiona empresa sia, maibé empresa neen mak submete dokumentus no ekipa avaliadór selesiona empresa haat mak sai hanesan vensedór.

Lee Mós: Prezidente Repúblika Apoia JKRAYA OIL ENERGY LDA Investe Iha Área Petróleu-Minerais

Governu konsidera anúnsiu rezultadu tenderizasaun hanesan momentu istóriku no reprezenta esforsu bo’ot iha esplorasaun minerais nian.

“Foin dahuluk ita halo esplorasaun formál iha seitór minerál, iha seitór petróleu hahú kedan ona antes restaura independénsia. Maibé iha esplorasaun minerál seidauk halo dezde tempu Indonézia, tempu UNTAET,” Hatutan.com sita deklarasaun Ministru Petróleu no Minerais, Francisco da Costa Monteiro iha komunikadu.

Governu adianta katak, ba oin empreza vensedora sei kompleta kondisaun balun antes realiza prossesu peskiza no investigasaun durante tinan tolu to’o haat no rezultadu hosi deskobrimentu sei hatama iha planu ezekutivu nian, molok emite lisensa ba esplorasaun minerál no metal ne’ebé bainhira esplora iha folin bo’ot iha merkadu internasionál, hodi apoia mós Timor-Leste nia ekonomia.

Iha fatin hanesan Prezidente ANM.IP, Rafael Denilson esplika, ekipa avalia empreza sira tuir termu referénsia, informasaun sira ne’ebé mak avalia iha prosesu ne’e mak hanesan, kapasidade téknika empreza sira, kapasidade finanseira no programa empreza sira oinsá tane aas konteúdu lokál, saúde no seguransa.

“Iha pré kualifikasaun haree liu bá empreza sira nia esperiénsia iha minerais,” Rafael Denilson  hateten iha komunikadu ne’e.

Empreza Beacon Mineral Pty.Ltd, Estrella Resoruces Pty.Ltd, Iron Fortune R.P no Peak Everest Mining. Ldt ne’ebé sai vensedór promete sei rekruta Timor-oan, fornese formasaun hodi realiza peskiza no investigasaun iha Munisípiu Baucau, Lautem, Manatutu no Rejiaun Administrativa Espesiál Oecusse Ambeno (RAEOA).

“Ami haksolok prepara no hakat bá etapa esplorasaun. Iha faze esplorasaun sei foka bá kriasaun servisu, abilidade foun no oportunidade ba timor oan, inklui peskizadór lokál no negósiu lokál,” Reprezentante empreza vensedora bá prosesu tenderizasaun ne’e promete.

Anúnsiu rezultadu ne’e realiza iha Hotel Timor no partisipa hosi Autoridade Munisípiu Baucau, Lautem, Manatuto, RAEOA, veteranu no parseiru sira.

Jornalista: Leopoldina de Carvalho