Hatutan.com, (08 Novembru 2023), Díli—Polémika konstrusaun bá edifísiu eskola Cesar Maulaka iha suku Haupu, postu administrativu Letefoho, autoridade lokál entrega hikas bá Ministra Edukasaun (ME), Dulce de Jesus atu buka solusaun.

Xefe Suku Haupu, Eusebio Alcino Maia ho Admintradór Postu-Administrativu Letefoho, António Manuel Soares. Foto: Tomé da Silva.

Xefe Suku Haupu, Eusebio Alcino Maia esplika, edifísiu foun eskola Cesar Maulaka ne’e bainhira harii iha tinan 2021, iha duni problema oitan entre autoridade lokál, parte Ministériu Edukasaun no mós Ministériu Obras Públika inklui na’in bá rai.

Lee Mós: Polémika Rai Konstrusaun Eskola Cesar Maulaka, Administradór Letefoho Husu MOP-MEJD Foti Desizaun

Nia dehan, dezentendimentu primeiru ne’e tanba laiha koordenasaun, enkunatu fatin ne’ebé Ministériu Edukasaun utiliza hodi harii edifísiu eskola ne’e kondideradu hanesan fatin sentru bá Letefoho tomak, liuliu bá suku 8 ne’ebé iha.

Jornalista Hatutan.com Zita Menezes hala’o entrevista ho Xefe Suku Haupu, Eusebio Alcino Maia. Foto: Tomé da Silva.

Autoridade lokál ne’e hatutan, maioria komunidade, liuliu xefe suku na’in-ualu la konkorda atu harii edifísiu eskola iha fatin ne’e tanba fatin ne’e sai sentru bá Letefoho tomak atu utiliza bá kualkér atividade, hanesan komemorasaun loron nasionál ruma hanesan Proklamasaun Unilaterál Indepedénsia  28 Novembru, no loron nasionál sira seluk, úniku fatin ida-ne’e mak bele akumula populasaun  hotu hosi suku 8 ne’e rasik no laiha tán fatin seluk.

Ho ida-ne’e maka xefe suku na’in-ualu asina no hato’o karta lamentasaun ida bá parte autoridade Munisípiu Ermera no parte Ministériu Edukasaun iha momentu ne’ebá, maibé laiha solusaun ruma.

“Konteúdu karta ne’e katak, ami la konkorda duni atu harii edifísiu eskola Cesar Maulaka iha fatin ne’e no to’o agora mós hanesan autoridade lokál kontinua la konkorda atu harii eskola iha fatin ne’e. Maski nune’e, edifísiu eskola ne’e harii ona entaun ida-ne’e ami entrega hikas bá Ministériu Edukasaun no parte Autóridade Terras Propriedade atu muda ka la muda ne’e desizaun iha parte hirak ne’e nai lima,” Eusébio Alcino Maia hateten bá Hatutan.com, iha CCD, foin lalais ne’e.

Edifísiu Eskola Sekundáriu Jerál, Cesar Maulaka Letefoho ne’ebé kontrusaun atinji ona 95%, maibé sei iha disputa. Foto/Cipriano Colo.

Nia mós haree katak, maski seidauk inaugura maibé estudante sira utiliza ona edifísiu foun ne’e hodi hala’o prossesu aprendizazen, no autoridade lokál ne’e fó fiar bá parte Ministériu Edukasaun ho Sekretária Estadu Terras no Propriedade (SETP).

Iha fatin hanesan, Admintradór Postu-Administrativu Letefoho, António Manuel Soares rekoñese katak, antes ne’e iha duni dezafiu bá espasu atu harii edifísiu foun eskola Sekundária Cesar Maulaka maibé oras ne’e utiliza ona bá prosesu aprendizazen tanba plaka inaugurasaun ne’e Eis Ministru Edukasaun Armindo Maia mak asina no hatuur ona iha eskola refere. 

Edifísiu Eskola Sekundáriu Jerál, Cesar Maulaka Letefoho. Foto/Cipriano Colo.

“Momentu halo inaugurasaun ne’e VIII Governu la halo iha fatin eskola nian maibé inaugura de’it iha munisípiu no data hau la fixa maibé iha Marsu 2023. Sira asina plaka iha munisípiu no inaugura simbolikamente hafoin lori plaka bá monta iha eskola Cesar Maulaka no autoriza atu utiliza bá prossesu aprendizazem,” nia esplika.

Tuir António Manuel Soares katak, agora daudaun estudante sira uza ona edifisiu eskola ne’e tanba kompañia mós entrega ona xave ho sala neen.

Lee Mós: Polémika Konstrusaun Eskola Cesar Maulaka, MEJD La Koordena ho Diresaun Terras no Propriedade Ermera

Jornalista Estajiária: Zita Menezes