Hatutan.com, (11 Dezembru 2023), Díli—Ministériu Komérsiu no Indústria (MKI) simu lamentasaun no keixa hosi empreza lokál sira katak, empreza importadór foos balun ne’ebé antes ne’e Governu kontrata ona atu fa’an foos 25 kg ho folin barratu, halo manipulasaun no deskonfia obriga atu sosa karik tenke ho pakote.

Vise-Ministru Komérsiu no Indústria, Agusto Junior Trindade. Foto: Tome da Silva.

Tanba ne’e, Vise-Ministru Komérsiu no Indústria, Agusto Junior Trindade delega ona ekipa atu halo investigasaun no konfirma ho importadór ne’ebé diskonfia halo manipulasaun ne’e atu buka hodi rezolve no bainhira la koopera sei hetan sansaun.

Lee Mós: Governu Sei Halo Ajustamentu Subsídiu bá Importadór Foos Lisun ho Alfa

“Iha lamentasaun barak hosi kompañia lokál sira tanba sira ba hola foos iha kompañia balun maibé obriga sira tenki hola pakote hanesan hola foos tenki hola mós ho super mie, masin-midar. Entaun kompañia lokál sira laiha kapasidade orsamentu atu kompra,” Agusto Junior Trindade hateten bá jornalista Hatutan.com iha knaar fatin, Segunda (11/12/2023).

Agusto Junior Trindade dehan, Governu ho seitór privadu tenki sai nu’udár parseiru ida bá moris di’ak povu nian, tanba ne’e husu bá kompañia hotu atu buka lukru ho razoável no labele fó presaun bá komunidade iha situasaun difísil.

Jornalista Hatutan.com Leopoldina de Carvalho hala’o entrevista ho Vise-Ministru Komérsiu no Indústria, Agusto Junior Trindade iha knaar fatin, Segunda (11/12/2023). Foto: Tome da Silva.

“Korseteza sei iha sansaun bá kompañia ne’ebé mak lakohi koopera ho Governu iha situasaun difísil,” nia hateten.

Ekipa monitorizasaun kontinua la’o hodi monitoriza situasaun iha terrenu liga ho foos ne’ebé distribui hosi kompañia perisos no Creative Furak no hein mós hosi kompañia Alfa no Lixun.

“Kompañia rua ne’e laiha estoke foos 20kg nian, entaun adjustamentu ne’ebé halo bá kompañia Alfa ho Lixun bazeia bá Dekretu Lei ne’ebé iha. Ezemplu, foos iha retallu kada kilograma labele liu $0,50. Kuandu liu ne’e kabe bá Governu nia apoiu,” Agusto Junior hateten.

Oras ne’e daudaun Governu iha ona konkordánsia ho Lisun no Alfa Dili hodi lansa foos kg25 ho marka foun ne’ebé mak sei distribui bá komunidade hodi bele fásil bainhira ekipa halo monitorizasaun.

Ministériu halo hela ezersisiu bo’ot ida, alende halo monitorizasaun bá foos hirak ne’ebé mak espalla iha munisípiu sira, liu-liu ho foos marka rua Beruang Merah ho Amor da Família.

Governu mós rekoñese katak, iha munisípiu balun liu-liu iha fatin izoladu sira foos la to’o iha ne’ebá, dala ruma to’o maibé hotu kedan no foos sira ne’ebé iha merkadu, tuir observasaun ekipa haree katak, bainhira foos ne’e to’o komunidade foti kedan tanba foos ne’e ho presu ida tun oitoan no ladún barak iha merkadu.

“Hosi informasaun hirak ne’e ami kontinua halo reuniaun regulár ho empreza importadór sira oinsa aumenta tán volume distribuisaun iha komunidade nune’e atu fó serteza katak minimu iha Natal ho Tinan foun ne’e bele sufisiente,” subliña.

Kona-bá preokupasaun hosi komunidade ne’ebé seidauk bele assesu bá foos folin baratu ne’e, Governu esforsu ho maneira oioin atu bele distribui foos hirak ne’e to’o iha área rurál involve Kámara Komérsiu Indústria Timor Leste (CCI-TL) atu bele apoia distribuisaun foos hosi postu admistrativu, suku no aldeia.

Jornalista: Leopoldina de Carvalho