Hatutan.com, (12 Dezembru 2023), Díli—Prezidente Repúblika (PR), José Ramos-Horta apoia estudu viabilidade foun bá konseitu dezenvolvimentu Greater Sunrise.

Reprezentante Espesiál Greater Sunrise Austrália, Steve Bracks hato’o deklarasaun ne’e hafoin hala’o sorumutu ho Prezidente Repúblika  José Ramos-Horta, iha Palásiu Prezidensiál Nicolau Lobato Bairru-Pité, Tersa (12/12/2023).

Lee Mós: Governu TL ho Woodside Kontinua Dezenvolve Projetu Greater Sunrise

Reprezentante Espesiál Greater Sunrise Austrália, Steve Bracks hala’o sorumutu ho Prezidente Repúblika José Ramos-Horta, iha Palásiu Prezidensiál Nicolau Lobato Bairru-Pité, Tersa (12/12/2023). Foto: PR.

Steve Bracks konsidera enkontru ho Prezidente Repúblika ne’e exelente tebes no halo diskusaun badak hanesan antes ne’e halo ona diskusaun ho Primeiru-Ministru (PM), Kay Rala Xanana Gusmão ne’ebé ko’alia kona-bá Greater Sunrise inklui Bayu Undan, liu-liu kona-bá kapturasaun ba karbonu.

“Prezidente Repúblika José Ramos Horta suporta no apoiu maka’as bá projetu Greater Sunrise foun ida ne’e bá oin,” Steve Bracks hateten.

Austrália iha komitmentu maka’as no espera liu hosi estudu konseitu ne’ebé sei halo, sei bele hetan rezultadu iha meiadu tinan oin.

“Sei laiha resposta pozitivu liu hosi enkontru hirak ne’e, maibé espera liu hosi rezultadu estudu konseitu ne’ebé la’o daudaun no meadu tinan oin iha fulan Juñu, bele iha ona resposta foun kona-bá dezenvolvimentu Greater Sunrise nian,” nia dehan.

Kona-bá estudu ne’ebé la’o daudaun, parte Austrália hein rezultadu hosi konseitu estudu foun ne’e bainhira rezultadu sai maka sei bele foti desizaun.

Kompara ho estudu ne’ebé la’o tiha ona antes, Austrália prefere estudu ne’ebé foun, kontemporáriu ho modernu bazeia ba tempu agora. Tanba estudu antes ne’e tempu la hanesan no agora buat barak ne’ebé iha mudansa.

Reprezentante Espesiál Greater Sunrise Austrália, Steve Bracks. Foto: PR.

“Hanesan iha Austrália mekanizmu foun oinsá atu kuidadu no haree LNG Plan sira ne’e, merkadu mós foun no iha akordu oi-oin ne’ebé involve iha projetu mina no gás nian. Entaun Austrália hein rezultadu ne’ebé hala’o daudaun ne’ebé tuir tempu ida agora,” nia dehan tán.

Projetu Bayu Undan nian besik remata ona, no Steve Bracks konsidera ida-ne’e importante tebes atu dezenvolve projetu Greater Sunrise nian, importante ba Timor atu kontinua hetan rendimentu ne’ebé sei ajuda Timor Leste nia ekonomia.

“Ami espera projetu ida-ne’e sei remata iha tinan oin tanba sira servisu maka’as. Entaun, ida-ne’e kontinua la’o ba oin. Iha negosiasaun tékniku ne’ebé la’o hamutuk, tanba hosi parte rua ne’e iha interese atu projetu ida ne’e dezenvolve iha tempu badak,” Steve Bracks afirma.

Iha Segunda (11/12/2023), representante Greater Sunrise Austrália Steve Bracks hasoru-malu ho Primeiru-Ministru (PM) Kay Rala Xanana Gusmão ne’ebé aseita no prefere halo estudu viabilidade foun.

Steve Bracks mós konsidera reuniaun ne’e di’ak tebes ho Primeiru-Ministru no akompaña hosi Ministru Petróleu no Rekursu Minerais, ko’alia kona-bá progresu ne’ebé la’o dadaun.

Alende ne’e, ko’alia mós kona-bá pasu tuir-mai iha prosesu dezenvolvimentu Greater Sunrise nian, liu-liu kona-bá konseitu estudu viabilidade ne’ebé daudaun ne’e la’o, espera ne’e iha progresu di’ak hodi kontinua ba oin.

Parte rua prefere estudu viabilidade foun ne’ebé mak empreza Join Venture sira deside ona atu halo estudu viabilidade foun bá konseitu dezenvolvimentu Greater Sunrise la’o di’ak no iha estudu ne’e rasik mak sei haree kona-bá ekonomia viável ne’ebé mak di’ak liu bainhira atu dezenvolve iha Timor-Leste ka Darwin  iha fulan Juñu 2024 iha ona rezultadu.

Antes ne’e, Ministru Petróleu no Rekursus Minerais, Francisco da Costa Monteiro mós hasoru malu ho CEO Woodside Meg O’Neil ho nia ekipa hodi deskuti kona-bá dezenvolvimentu Greater Sunrise.

Kompaña Petrolífera Woodside no Timor-Leste konkorda atu servisu hamutuk no fiar malu, tanba Governu Timor-Leste aprova ona estudu bá selesaun konseitu ba projetu ne’e.

TIMOR GAP no Autoridade Nasional Petróleu (ANP) no Kompaña Joint Venture mós hala’o ona enkontru intensivu hodi finaliza dokumentu ne’ebé aprovadu no analiza mós Kódigu Mineiru ba Petróleu, Rejime Taxa no Kontratu ba Partilla Produsaun.

Estadu Timor-Leste liu hosi Timor GAP, E.P hola parte ona iha konsórsiu Greater Sunrise, ho partisipasaun maioria reprezenta 56,56%, Woodside (operadora) 33,44% no Osaka Gas 10%.

Jornalista: Vito Salvadór