Hatutan.com, (20 Dezembru 2023), Díli—Parlamentu Nasionál (PN) aprova ona Orsamentu Jerál Estadu (OJE) 2024  bé Servisu Nasionál Ambulánsia no Emerjénsia Médika, Institutu Públiku (SNAEM I.P)  ho montante $2.473.928 iha debate espesialidade ho rezultadu votasaun a- favor 44, kontra 0, abstensaun 21.

Edifísiu Sentru Saúde Atsabe ne’ebé ameasadu atu monu tanba rai halai (09/02/2023). Foto/Cipriano Colo.

Montante $2.473.928 fahe bá kategoria Saláriu  Vensimentu $1.129.037, Bens Servisu Korrentes $894.891, Tranferénsia Públika $125.000, Kapital Menór $325.000, Kapital Dezenvolvimentu  zero.

Lee Mós: Problema Sériu Iha Ministériu Saúde, Lian Hosi Médiku Espesialista Ne’ebé Lian Laek

Deputada Bankada FRETILIN, Helena Martins Belo husu Governu atu aumenta rekursu umanu liuliu motorista bá ambulánsia nian atu bele fó atendimentu di’ak liu bá komunidade iha área rurál.

“Ha’u hakarak husu tanba iha rekrutamentu ba iha pessoál motorista bá iha ambulánsia ne’e presiza tebes. Iha terrenu ami bá ambulénsia iha rua, motorista ne’e ida de’it no nunka iha lisensa. Iha fali balun iha voluntáriu mak kaer ambulánsia. Tanba ne’e, husu esklaresimentu parte ida-ne’e atu bele esplika katak iha orsamentu parte ida-ne’e bele akomoda bá iha preokupasaun ne’ebé iha rrekrutamentu bá iha motorista foun ka oinsa,” Helena Martins Belo hateten.

Nune’e mós Deputada bankada FRETILIN, Cristina Yuri Ribelo  preokupa ho ekipamentu hanesan ambulánsia iha munisipiu ne’ebé difikulta tebes servisu médiku sira nian bainhira hala’o atendimentu.

“Lamentasaun barak mai hosi motorista sira tanba motorista balun hala’o servisu barak liu maibé simu osan kiikoan liu. Balun la hetan tán ekstra ruma ba sira nia servisu. Entaun, ida-ne’e ita haree bá alokasaun orsamnetu ida-ne’e, se bele halo rekrutamentu ba sira no mós ekipamentus bá ambulánsia,”  Sristina Yuli Ribelo hateten.

Jornalista: Leopoldina de Carvalho