Hatutan.com, (03 Janeiru 2024), Díli—Rai-nakdoko makaas no alerta bá tsunami iha área Noto besik Ishikawa, Japaun, hamate ema na’in 48 no Governu alerta ona bá ema na’in 100.000 tenke refujia bá fatin seguru.

Hatutan.com sita publikasaun BBC News Indonesia katak, vítima hirak ne’ebé mate, autoridade sira hetan maioria iha perfeitura Ishikawa, iha área tasi ibun norte Honshu, illa prinsipál Japaun nian.

Populasaun Japaun hakat liu hosi edifisiu sira ne’ebé monu tanba rai nakdoko iha Nanao, prefeitura Ishikawa, Tersa (02/01). Foto: Reuters.

Primeiru Ministru Japaun, Fumio Kishida hateten, forsa defeza Japaun nian kuaze 1.000 oras ne’e daudaun esforsu hela hodi buka-tuir no salva área ne’ebé sorfe bá rai nakdoko.

Lee Mós: Rai Nakdoko Makas Iha Turkia-Síria Hamate Ema 4.300

“Ita nia forsa defeza enfrenta hela dezafiu barak atu bele to’o iha área ne’ebé sofre bá dezastre naturál tanba estrada aat hotu. Maibé, ema sira ne’ebé mak agora edifísiu boot sira hanehan hela presiza tebes atu salva sira urjentemente molok edifisiu sira ne’e rahun,” Hatutan.com sita deklarasaun Kishida ne’ebé publika hosi BBC News Indonesia, Tersa (02/01).

Primeiru Ministru Japaun ne’e deklara katak, nia orienta ona forsa defeza Japonés sira atu esforsu hodi halo buat hotu ne’ebé sira bele, nune’e salva lalais vítima sira tanba balun iha hela rai okos, balun iha hela edifísiu boboot sira nia okos, balun iha hela tasi ibun no seluk tán.

Edifisiu ida ne’ebé rahun tanba rai nakdoko iha Wajima, prefeitura Ishikawa, Japaun. Foto: Reuters.

Iha publikasaun Reuters nian, sidadaun Japaun nian ho naran Nobuko Sugimori, ho idade 74 iha sidade Nanao hateten katak, nia nunka enfrenta situasaun ne’e liuliu rai nakdoko ho nia forsa boot hanesan akontese daudaun ne’e iha nia vida tomak.

Rai nakdoko ho nia forsa magnitudo 7,6 ne’e provoka tsunami iha área súl, norte no sentrál Japaun nian, ho nia forsa laloran tsunami iha fatin balun atinje metru 5 hosi tasi ibun.

Tuir publikasaun hosi ajénsia notísia Japaun nian NHK  relata katak, to’o oras-ne’e, laloran ho nia aas kauze metru 1,2 tama to’o iha área Wajiima besik perfeitura Ishikawa, Segunda (01/01) tuku 16.21 oras lokál.

Tuir publikasaun NHK katak, antes ne’e Governu Japonés aviza ona bá populasaun iha área tasi ibun perfeitura Ishikawa atu bele evakua lalais bá iha foho.

Jeffrey Hall, dosente ida iha Universidade Kanda iha Japaun hateten, nia sente duni rai ne’e nakdoko makaas durante minutu rua nia laran, maski rai nakdoko ne’e ninia sentru akontese iha área seluk iha Yokohama.

Dosente ne’e haktuir bá BBC katak, rai nakdoko ne’e hanesan buat ida ne’ebé sériu tebes bá Japaun ninia emar sira ne’ebé tauk tebtebes.

Portavós Governu Japonés, Yoshimasa Hayashi, alerta ona bá populasaun atu matan moris neon na’in hodi enfrenta rai nakdoko sekundáriu.

Iha tinan 2011, Japaun sofre ona bá rai nakdoko ho forsa magnitudo 9,0 no mós tsunami iha área Leste nasaun ne’e no hamate ema na’in 18.000, ema rihun ba rihun mak refujia.*