Hatutan.com, (20 Janeiru 2024), Díli—Primeiru-Ministru (PM), Kay Rala Xanana Gusmão, apresia no agradese bá esforsu hotu ne’ebé halo hosi lideransa sira iha Word Trade Organization (WTO) ka Organizasaun Mundiál Komérsiu (OMK), no aseita ka simu ona Timor-Leste (TL) bele hola parte nu’udár membru permanente.

Primeiru-Ministru, Kay Rala Xanana Gusmão hala’o enkontru ho Diretora Jerál Organizasaun Mundiál Komérsiu (OMK), Ngozi Okonjo-Iweala durante partisipa Forum Ekonómiku Mundiál (World Economic Forum) bá dala-54 iha salaun enkontru Bilaterál, Davos-Klosters, Suiça 15-19 Janeiru 2024. Foto: GPM.

Xefe Governu hato’o apresiasaun ne’e durante hala’o enkontru ho Diretora Jerál OMK, Ngozi Okonjo-Iweala akompaña hosi Embaixadora no Reprezentante Permanente Misaun Timor-Leste nian iha Jenebra, Maria de Lurdes Martins de Sousa Bessa, antes partisipa Forum Ekonómiku Mundiál (World Economic Forum) bá dala-54 iha salaun enkontru Bilaterál, Davos-Klosters.

Lee Mós: TL iha Ona Faze Ikus Atu Sai Membru OMK

Governu Timor-Leste hala’o ona reuniaun Grupu Traballu da-hitu hodi hatudu progressu iha loron 11 Janeiru 2024, marka pasu krusiál bá Timor-Leste antes Konferênsia Ministeriál OMK nian bá dala 13 (MC13) ne’ebé sei akontese iha loron 26 to’o 29  fevereiru 2024 iha Abu Dhabi,  Emiradus Árabes Unidus, hodi simu pedidu Timor-Leste nian  sai membru OMK.

“Ha’u hala’o mós enkontru ho Diretora Jerál WTO, senhora Ngozi Okonjo-Iweala nia elojia ita nia eforsu no ha’u mós agradese tebes ba ninia kontribuisaun dudu prosesu ita nia iha fevereiru 2024 agora iha Abu Dhabi bele asina ona akordu ita sai membru Organizasaun Mundiál Komérsiu,” Hatutan.com sita deklarasaun Xanana iha komunikadu, Sábadu (20/01/2024).

Embaixadora no Reprezentante Permanente Misaun Timor-Leste nian iha Jenébra, Maria de Lurdes Martins de Sousa Bessa, agradese mós tanba servisu ne’ebé nia parte hala’o, kontinua lori TL marka ona pasu signifikativu iha jornada integrasaun ekonómia globál ne’ebé konklui ona ho sussesu liuhosi Reuniaun Grupu Traballu da-hitu hodi adere bá OMK.

“Grasas de-Deus ho  servisu ida boot tebe-tebes ho esforsu koletivu ida ho ita-nia governu to’o ekipa tékniku sira ho apoiu hosi WTO nia rasik, ita konsege duni kompleta prossesu servisu hodi konfirma ita nia adezaun,” Lurdes Bessa agradese.

Momentu importante ne’e sai nu’udár pasu krusiál iha jornada Timor-Leste nian hodi sai membru  plenu ba organizasaun komersial globál ne’e.

Asuntu seluk tán bá servisu ne’ebé Embaixadora Lurdes Bessa hala’o maka reprezenta Timor-Leste iha Organizasaun Nasoes Unidas (ONU), Suiça no Monaco hodi servisu no koopera hamutuk ho organizasaun internasionál sira hodi luta bá kestaun direitu umanus nian.

“Servisu ne’ebé ita hala’o mezmu sede iha Jenébra, maibé ita fokus ba servisu iha Organizasaun Nasoes Unidas assuntu boot ida ne’ebé ita trata maka direitus umanus. Ita hatene katak, fofoun ita atu kandidata aan ba Membru Konsellu Direitus Umanus ba tinan 2024-2026. Maibé, ita adia ba 2026-2029 ne’e hodi fó tempu ba ita prepara aan di’ak liután hodi prepara ita nia kandidatura ne’e,” nia informa.

Dadaun ne’e Embaixadóra Lurdes ho diplomata feto Timoroan na’in-rua inklui sidadaun estranjeru ida mak hala’o servisu iha Jenébra hodi apoia servisu reprezentasaun Timor-Leste nian.

Jornalista: Rogério Pereira Cárceres