Hatutan.com, (21 Janeiru 2024), Díli—Primeiru-Ministru (PM), Kay Rala Xanana Gusmão akompaña hosi autoridade provínsia Bali, Indonézia inaugura edifisiu foun Konsul Jerál Repúblika Demokratica de Timor-Leste (RDTL) iha Provínsia Bali.

Primeiru-Ministru (PM), Kay Rala Xanana Gusmão akompaña hosi autoridade provínsia Bali, Indonézia inaugura edifisiu foun Konsul Jerál Repúblika Demokratica de Timor-Leste (RDTL) iha Provínsia Bali (19/01/2024. Foto: GPM.

Serimónia inagurasaun ne’ebé hahú ho orasaun no bensaun hosi Pro-Diáknu, Karel Wodang  hosi Katederál Denpasar no asina plaka inagurasaun hosi Primeiru-Ministru Xanana Gusmão asiste hosi Membru Konsellu Reprezentantivu Rejionál Repúblika Indonézia, Arya Wedakarna, Sekretáriu Rejionál Provínsia Bali, Dewa Made Indra, Konsul Jerál Timor-Leste ba Bali, Aleixo V. da Silva, autoridade polisia no militár, migrasaun, korpu diplomatiku sira, iha área Tukad Mas I/no 4-Renon Bali.

Lee Mós: Jokowi Simu Xanana iha Forum AIS Bali

Konsul Jerál Timor-Leste iha Bali, Aleixo V. da Silva informa edifisiu ne’e reprezenta imajen Estadu Timor-Leste nian iha ASEAN liu-liu iha Bali hodi atende servisu no vizita entidade Estadu Timor-Leste no povu Timor-Leste ne’ebé hala’o movimentu ba estranjeru liu hosi Bali.

“Ho orgullu ha’u hakarak informa katak, edifisiu foun ida-ne’e reprezenta misaun diplomátiku Timor-Leste nian, tanba responsabilidade servisu ba nasaun,” Hatutan.com sita deklarasaun Aleixo V. da Silva iha komunikadu.

Konsuladu Timor-Leste hahú harii primeiru iha Bali iha fulan Outubru 2006 ho pozisaun estratéjiku hodi hametin kooperasaun entre Timor-Leste ho Indonézia, liu-liu iha Bali.

Kooperasaun Timor-Leste no Indonézia la’ós foin maka estabelese, maibé hanoin hikas ba pasadu rezisténsia, istória luta no rekonsiliasaun entre Timor-Leste no Indonézia hahú kedan ona ho lideransa Komandante Em Xefe das FALINTIL, Kay Rala Xanana Gusmão no Koronel Purwanto, Jenerál Militar Indonézia Timor-Timur halo kontaktu dame Larigutu (Kontak Dame Larigutu) loron 20 de Marsu 1983.

Hosi istória ne’e maka inspira nasaun rua harii  Comisaun Verdade no Amizade (CVA-TL no CVA-Indonézia) hala’o misaun lori povu no nasaun rua harii hikas dame no servisu hamutuk.

“Rekonsiliasaun no dame sai inspirasaun ba deenvolvimentu nasionál ne’ebé sai inspirasaun ba futuru moris entre povu no rai rua,” Konsul Aleixo informa.

Ba oin, Konsul Jerál Aleixo kontinua reprezenta Timor-Leste hodi hametin kooperasaun servisu iha área prioridade sira ne’ebé sei fó benefisiu ba povu no nasaun rua.

Alende inaugura edifisiu foun, Konsul Jerál Aleixo ho ekipa halo jestaun ba Orsamentu Jerál Estadu (OJE) hodi sosa mós karreta foun ida ho marka Alphard ne’ebé uza hodi tula bainaka VIP Estadu Timor-Leste.

Iha fatin hanesan, Membru Konsellu Reprezentantivu Rejionál Repúblika Indonézia-Bali, Arya Wedakarna hato’o parabéns bá Timor-Leste tanba iha ona edifisiu rasik hodi koopera no hala’o servisu nasaun nian iha Bali.

“Parabéns ba Timor-Leste ne’ebé ohin iha rasik ona edifisiu di’ak ida-ne’e. Indonézia tenki besik liután hodi kria ninia amizade ho Timor-Leste.  Primeiru ita haree liu ba istória,” Arya agradese.

Indonézia mós observa katak, prossesu kontrusaun infraestrutura iha Dili avansadu tebes nu’udár nasaun foun no Indonézia orgullu no konsidera Xanana nu’udár lider di’ak ida ne’ebé hala’o servisu no lori progressu rekosiliasaun Timor-Leste no Indonézia metin fila-fali iha istória nasaun no povu rua ninian.

Indonézia mós apresia halo esforsu makas no apoia Timor-Leste hola parte iha membru ASEAN.

Fatin hanesan, Sekretáriu Rejionál Provínsia Bali, Dewa Made Indra hato’o bem vindo bá Primeiru-Ministru Xanana Gusmão ne’ebé partisipa iha eventu ne’e hatudu kooperasaun Timor-Leste ho Indonézia ne’ebé di’ak tebes.

“Agradese tebes ho Primeiru-Ministru Xanana nia partisipasaun hodi hametin kooperasaun entre Timor-Leste no Indonézia liu-liu Bali hodi mai inaugura edifísiu ida-ne’e. Ami reprezenta povu no Governu Rejionál Bali hato’o parabéns no ho inaugurasaun ida-ne’e hodi hametin liután kooperasaun entre Estadu no povu rai rua iha area oin-oin,” nia agradese.

Nia hatutan, inaugurasaun uma ne’e ne’e la’òs haree konstrusaun fiziku foun ne’e, maibé haree liu kooperasaun iha área politika, religiaun, kultura, sosiál, edukasaun, saúde, turizmu no área prioridade seluk tán.

Tuir relatóriu autoridade migrasaun Indonézia nian hatudu katak, kada tinan 2022 to’o 20223, turista hosi Timor-Leste viazen bá Bali ho númeru boot tebes.

“Tuir relatóriu imigrasaun nian iha tinan 2022, iha turista hamutuk 15.943 no iha tinan 2023 turista hamutuk 32.276 nu’udár turista hosi Timor-Leste no númeru aumenta kada tinan. Ida-ne’e hadutu katak, povu Timor-Leste no Indonézia iha istória di’ak,” nia agradese.

Edifisiu foun ne’e uza ba servisu entre ekipa reprezentante linã ministériu sira hanesan, Asistente Adidu Migrasaun Ajente Xefe, Grigorio Soares Pinto, Asistente Adidu Edukasaun,  José Maria Gonçalves,  Adidu Saúde no Asistente, ekipa protokolu no funsionáriu hamutuk na’in-23 kompostu hosi sidadaun Indonézia na’in 16 servisu iha área administrasaun, motorista, seguransa no jardineiru.

Serimónia ne’e termina ho festa hananu muzika dame no tebe hamutuk hasai fotografia hamutuk nu’udár sinál agradesimentu no amizade.

Jornalista: Rogério Pereira Cárces