Hatutan.com, (07 Fevereiru 2024), Díli—Parlamentu Nasionál (PN) liu hosi Prezidente  Komisaun F ne’ebé trata assuntu Saúde Seguransa Sosiais no Igualdade Jéneru, deputada Maria Barreto Gorumali deklara katak, bankada FRETILIN iha kompeténsia atu halo keixa hasoru bá Ministériu Públiku (MP) hasoru Ministra Saúde (MS) Elia dos Reis Amaral no kompañia Sali-Magu bainhira sira la satisfas ho situasaun reál ne’ebé akontese iha área saúde nian.

Prezidente Komisaun F Parlamentu Nasional  (PN) ne’ebé trata assuntu saúde, seguransa sosiál no igualdade jéneru, Maria Gorumali Barreto.

“Ha’u nia hanoin katak, di’ak liu sira bá halo keixa ne’e kompeténsia no direitu kada bankada oposizaun nian, sé nia senti la satisfás, du ké kada semana plenária sempre levanta kestaun ida-ne’e,” Prezidente Komisaun F, deputada Maria Barreto Gorumali hateten iha PN, Kuarta (07/02/24).

Lee Mós: Bankada FRETILIN Halo Keixa bá MP Hasoru Ministra Saúde Élia dos Reis Amaral

Maria Barreto Gorumali dehan, maski Komisaun F iha ona dadus no faktus ne’ebé forte, maibé bankada FRETILIN la konsidera no la simu, entaun bankada ne’e iha kompeténsia atu halo keixa bá Ministériu Públiku depois iha ne’ebá mak bele iha desizaun ida ne’ebé maka justu.

Deputada bankada CNRT ne’e mós haktuir, bankada FRETILIN iha kompeténsia tomak hodi halo keixa bá Ministériu Públiku hodi bele hetan solusaun hosi Tribunál.

Klaru katak, ministra saúde abuzu duni podér ka ministra saúde la abuzu podér maibé nia foti desizaun bazeia bá Lei aprovisionamentu ne’ebé mak iha.

Tanba ne’e, Komisaun F senti katak, ne’e kompeténsia no direitu bankada oposizaun nian, bainhira la simu esplikasaun hosi bankada Governu.

Tuir nia, Komisaun F halo fiskalizasaun no identifika katak, desizaun hirak ne’ebé ministra saúde Elia dos Reis Amaral foti ne’e tuir prossesu aprovizionamentu.

Nia esplika, molok ministra saúde foti desizaun bá ida-ne’e, antes ne’e lori uluk bá iha Konsellu Ministru hodi foti desizaun no prossesu aprovizionamentu, depois bá iha Tribunál da Kontas hodi fó vistu réviu bá iha Ministériu Saúde katak bele autoriza kompañia Sali-Magu hodi halo kompras.

Tanba ne’e maka, Komisaun F mós defende katak, ho faktus no prossesu legál sira ne’e maka sai duni baze legál bá ministra saúde ho kompañia Sali-Magu atu sosa ai-moruk bá SAMES.

Jornalista Estajiária: Zita Menezes