Hatutan.com, (19 Fevereiru 2024), Díli-Diplomata sira no balu hanesan adidu bá seguransa nian hosi estranjeiru ne’ebé rezidente no naun-rezidente iha Timor hamutuk 13 apresia servisu Polísia Nasionál Timor-Leste (PNTL) hodi garantia pás no estabilidade iha rai-laran.

Lee Mós: Komandu PNTL ho F-FDTL Forma Ekipa Hodi Investiga Kazu Tiru Membru Forsa Navál

Apresiasaun ida ne’e hato’o liuhosi enkontru aprezentasaun no atualizasaun dadus kríme nian durante tinan ida nia laran, ne’ebé atualiza hosi komandu jerál PNTL iha sala auditóriu Kuartel Jerál, PNTL,  Caicoli-Dīli, Segunda (19/02/2024).

Komandu Jerál PNTL halo enkontru ho korpu diplomatiku sira iha Timor-Leste, Segunda (19/02/2024). Foto/Elio dos Santos da Costa

Dadus ne’ebé hato’o iha sorumtu ne’e, ligadu ho krime sira mak akontese iha 2023 nia laran, kona-bá tipu krime sira, nível kríme, dadus asidente no insidente nian mak akontese iha territóriu nasionál.

Komandante PNTL bá asuntu Operasaun Nasionál, Superindente Xefe PJosé Soares, esplika, enkontru ida ne’e, sira halo kada tinan ho nia objetivu mak oinsá atu bele partilla kona-bá situasaun seguransa interna iha tinan tomak 2023 ninian, saida mak PNTL halo, krime no asidente ho insidente sira ne’ebé mak envolve grupu artes marsiál

“Ida ne’e mak ita partilla ho ita nia maluk diplomata sira, atu nune’e, sira hatene no saida mak ita halo, sira apresia tebes, nune’e, bele iha kontaktus, entre individu, diplomata sira ho autoridade seguransa, nune’e, kuandu sira halo servisu ruma, tantu iha kapitál Dïli, nune’e mós bainhira sira halo viájen bá iha munisípiu karik sira hasoru insidente ka asidente iha dalan, sira kontaktu polísia,” Komandante PNTL bá asuntu Operasaun Nasionál, Superindente Xefe Polísia José Soares,  hateten.

Komandante operasaun ne’e dehan, iha tinan uluk, diplomata sira ne’e mós apresia, kuandu iha atividades boot ruma, hanesan taka dalan, komandu PNTL sempre atualiza bá sira, no informasaun ida ne’e, útil tebes bá diplomata sira, atu sira bele akompaña, atu nune’e, dalan ne’ebé maka taka, sira bele foti altermativa.

La’ós ne’e de’it, kuandu iha insidente balu ne’ebé mak akontese iha área-área ne’ebé de’it, PNTL informa sira, atu bele evita liuhosi área sira ne’e. aktu ida ne’e halo, hodi bele hametin relasaun di’ak ho parseiru internasional sira.

Liuhosi Timor-Leste nian kanál úniku, Ministériu Negósiu Estranjeiru no Kooperasaun nian maibé, parte PNTL mós hala’o servisu tuir mandatu sira ne’ebé hatuur iha lei, atu bele estabelese relasaun di’ak, fahe informasaun ho diplomata sira, ne’e importante bá sira.

“Sira apresia kona-bá aktualizasaun informasaun bá sira kona-bá asidentes, krime, asidente sira, insidentes ne’ebé mak envolve individu, ou grupus artes marsiais nian, sira iha obrigasaun. Sira hatene, atu nune’e fó espasu di’ak bá sira, i atu sira bele movimentu iha kapitál Dili, nune’e mós bá iha munisipiu,” nia tenik.

Diplomata sira ne’ebé mak nia rezidénsia iha Timor-Leste, nune’e mós sira ne’ebé seidauk iha nia rezidente iha Timor, liu-liu bá adidu seguransa ninian, balu seguransa laiha, sira militár, balu la’os militár, sira reprezenta hosi sira-ninian sekretáriu, ohin partisipa sorumutu ho komandu PNTL ne’e, mai hosi embaixada Japaun, Korea Súl, Brunei Darusalam, Cuba, Filipina, Australia, Malázia, Tailandia, Nova Zelandia, Portugal, Indonézia, Estadus Unidus Amerika, no reprezenante sira hosi UNDP, União Europeia, UNDSS, ho TLPDP.

Jornalista: Rogério Pereira Cárceres