Hatutan.com, (25 Fevereiru 2024), Díli -Tribunál Judisiál Primeira Instánsia Díli (TJPID), Domingu (25/02/2024), halo primeiru interrogatóriu bá arguido na’in-rua ho inisiál J no HM ne’ebé halo tentativa omisídiu hodi uza samurai taa sidadaun ida iha karreta Grand-Max laran iha área Bebora, Díli.

Lee Mós: Polísia Kaptura Suspeitu Ida Envolve Kazu Taa Luis Vicente iha Kampu Baru

Iha Sesta, 23 fulan-Fevereiru 2024, hale’u tuku 3.00 dadeer, arguido na’in-rua kondús  motorizada Honda Beat ho katana  iha liman soke karreta Grand Max ida no hadeer mai tenta atu taa sidadaun ne’ebé lori karreta ne’e.

Polísia asegura arguido na’in-rua ne’ebé taa ema iha área Bebora, Díli, Sesta madrugada (23/02/2024). Foto/Tome da Silva

Hafoin arguido na’in-rua halo tiha asaun ne’e, PNTL Eskuadra Dom Aleixo asegura kedan suspeitu ida no loron tuir mai asegura tán suspeitu ida seluk.

Iha primeiru interrogatóriu ne’e Ministériu Públiku ne’ebé reprezenta hosi Prokuradór Ricardo promove arguido sira ho krime  rua; arma branka ho tentativu omisídiu.

Iha sala julgamentu  arguido na’in-rua nia Defeza Henrique Maris, husu bá Tribunál atu foti medida koasaun ne’ebé adekuadu tuir Tribunál nia haree.

Hafoin rona tiha parte Tribunál aplika medida koasaun  Aprezentasaun Periódika kada semana aprezenta an iha Polísia bá arguido sira. nune’e, Defeza konsidera desizaun ne’ebé Tribunál foti ne’e adekuadu.

Defeza nia haree Tribunál nia desizaun hodi aplika medida koasaun aprezentasaun periódika bá nia kliente na’in-rua ho inisiál J no HM ne’e adekuadu tanba arguido na’in-rua lori katana, maibé ho arguido sira-nia deklarasaun  kooperasaun  bá iha justisa  tanba investigasaun bá kazu ne’e sei kontinua.

Primeiru Interrogatóriu  ne’e preside hosi Juiz turnu José Maria de Araujo, Ministériu Públiku reprezenta hosi Prokuradór Ricardo no Arguido sira hetan asisténsia hosi Defensór Públiku Henrique Maris.

Jornalista Estajiáriu : Lazaro Pereira Quefi