Hatutan.com, (24 Fevereiru 2024), Díli -Tribunál Judisiál Primeira Instánsia Dili (TJPID) liuhosi primeira interrogatóriu, Sábadu (24/02/2024), aplika medida koasaun haat (4) bá arguido na’in-tolu (3) nu’udár jerente bá Farmásia Moris Foun relasiona ho kazu hatama ai-moruk ilegál ho item 150.

Lee Mós: Deskonfia Fa’an Ilegál Ai-moruk Item Neen iha Farmásia Moris-Foun, Polísia Detein Suspeitu Na’in-tolu

Media koasaun sira-ne’e mak hanesan; tenke selu koima bá Estadu,  aprezentasaun periódika, proibisaun auzénsia no Tribunál husu PNTL atu devolve fali ai-moruk item 150 ne’e.

Arguido sira hosi kazu Farmásia Moris Foun aprezenta aan bá Tribunál Judisiál Primeira Instánsia Dili (TJPID), Sábadu (24/02/2024). Foto/Lazaro Pereira Quefi

Iha prosesu primeiru interrogatóriu ne’e Ministériu Públiku  ne’ebé reprezenta hosi  Prokuradór Matias Soares promove arguido na’in tolu ho inisiál  DIBS, JP no HDC bá krime artigu 140  ne’ebé hateten omisídiu neglijente,  artigu  214 ne’ebé hateten produtu sira falsu ka aat, 303 ne’ebé hateten falsifikasaun bá dokumentu ka anotasaun téknika, artigu 304 hateten  kona-ba  falsifikasaun agravada, 310 kona-bá  kontratasaun bá selus, kuñu, marka ka xansela sira, artigu 314, kona-bá fraude fiskál,  artigu 315 kona-bá importasaun no esportasaun ilísita hosi rikusoin ka merkadoria sira,  artigu 316  ne’ebé sita kona-bá kontra bandu, artigu  317 ne’ebé sita kona-ba  hakseko an.

Durante interrogatóriu MP alega arguido DIBS ho medida koasaun Prizaun Preventiva,  tanba durante iha interrogatóriu dahuluk Ministériu Públiku haree arguido nia hahalok ne’ebé nia prienxe medida koasaun Preventiva, enkuantu arguido JP, Ministériu Públiku husu bá Tribunál aplika medida koasaun Proibisaun auzénsia hodi sita arguido nian pasaporte.

Arguida HDC,  Ministériu Públiku husu bá Tribunál aplika  medida koasaun  Aprezentasaun Periódika (AP) kada fulan, dala ida, hodi aprezenta aan ba Ministériu Públiku no polisia ne’ebé besik.

Defeza husi arguido na’in tolu, advogadu privadu Pedro Camões husu Tribunál atu aplika medida koasaun ne’ebé adekuadu  bá arguido sira, tanba arguido sira laiha indísiu ida katak komete krime ne’ebé Ministériu Públiku promove bá sira.

Defeza hosi arguido sira  husu bá Tribunál  atu foti medida koasaun ne’ebé nesesáriu bá nia kliente sira mak ida medida koasaun katak Farmásia Moris Foun  tenke selu de’it koima bá Estadu. Tanba ai-moruk ne’ebé mak foin daudauk autoridade polísia sita ne’e ai-moruk barak mak  iha lisensa  no balun mak posibilidade laiha lisensa hosi Ministériu Saúde.

Medida seluk ne’ebé Defeza husu ba Tribunál mak aplika medida koasaun Aprezentasaun Periódika bá arguido sira hodi aprezenta aan  kada fulan, dala ida, iha edifísiu MP no polísia ne’ebé besik.

Arguido sira hosi kazu Farmásia Moris Foun aprezenta aan bá Tribunál Judisiál Primeira Instánsia Dili (TJPID), Sábadu (24/02/2024). Foto/Lazaro Pereira Quefi

Medida koasaun seluk ne’ebé Defeza husu ba Tribunál atu aplika ba nia kliente sira mak proibisaun no medida koasaun ne’ebé Tribunál aplika mak husu ba parte autoridade polisiál atu  devolve hikas ai-moruk sira ne’ebé antes ne’e polísia sira halo ona apreensaun bá fali Farmásia Moris Foun, nune’e  Farmásia ne’e bele halo fali nia atividade regular hodi  utiliza ai-moruk hirak ne’e ba halo fali atendimentu.

Hafoin rona tiha deklarasaun hosi parte hotu, Tribunál entende katak medida koasaun haat ne’ebé mensiona nesesária duni hodi aplika ba arguido sira.

Defeza hosi arguido nain tolu Pedro Camões, hateten Tribunál aplika medida koasaun haat ba arguido nain tolu mak  media kausaun, signifika Farmásia Moris Foun tenke selu koima ba ai-moruk sira ne’ebé deskonfia la rejista hodi  garante prosesu investigasaun.

“Ho medida ne’ebé Tribunál aplika ne’e arguido sira-ne’e Tribunál husik sira bele fila ba uma no hanesan parte Defeza bá desizaun ne’e adekuandu,” Pedro Camões,  haktuir bá jornalista sira.

Valór kaosaun  osan ka valór koima ne’ebé Farmásia Moris  atu selu ba Estadu,  Defeza Pedro Camões la hatene, tanba nia parte seluk seidauk simu  despaxu hosi Juiz turnu.

Audiénsia primeira interrogatóriu judisiál ne’e  prezide hosi Juiz José Maria de Araújo, Ministériu Públiku reprezenta hosi Prokuradór Matias  Soares, arguido sira hetan asisténsia legal  hosi advogadu privadu Pedro Camões ho  Januário Martins.

Lee Mós: Hatama Ai-moruk Ilegál Fó Prejuizu bá Estadu

 Jornalista Estajiáriu:  Lazaro Pereira Quefi